Выслухаюць і дапамогуць
Можна з упэўненасцю сказаць, што сектар “адно акно”, размешчаны ў будынку Лепельскага райвыканкама, з’яўляецца адным з самых наведваемых месцаў грамадзян. Штодзень за атрыманнем розных відаў даведак сюды звяртаецца каля трыццаці чалавек.
42 працэдуры ў сектары ажыццяўляюцца ў адносінах фізічных асоб і дванаццаць — у адносінах юрыдычных. Да таго ж работнікамі сектара практычна кожны дзень даецца наведвальнікам шэраг кансультацый.
І тут вельмі патрэбна ўменне хутка ўвайсці ў курс справы, дакладна вывучыць сітуацыю, проста і дасціпна данесці патрэбную інфармацыю. Асабліва ж тут патрэбны шчырасць і ўзаемаразуменне.
Вопытны юрыст Паліна Плюгач тут працуе з 18 мая 2010 года, амаль год — Рэгіна Васюковіч, якая не адзін дзясятак год аддала рабоце ў аддзеле ЗАГС райвыканкама і набыла значны прафесійны вопыт.
— На працягу трох месяцаў гэтага года да нас звярнуліся 950 чалавек, — расказвае Паліна Плюгач. — Найбольш часта звяртаюцца з пытаннямі жыллёвай сферы, а таксама галіны архітэктуры — тлумачым парадак увядзення дома ў эксплуатацыю, у тым ліку самавольных збудаванняў. Нямала наведвальнікаў звяртаецца да нас для афармлення паслуг па газіфікацыі жылых дамоў, афармлення льготнага крэдытавання рэканструкцыі жылых дамоў, газіфікацыі і г.д. Не губляюць сваёй актуальнасці пытанні прыватызацыі жылля. Як правіла, да нас звяртаецца чалавек з заявай, мы адпраўляем запыт у ЛКУВП ЖКГ “Лепель” для разліку кошту жылля, затым дакумент разглядае галоўны спецыяліст аддзела жыллёва-камунальнай гаспадаркі райвыканкама Аляксандр Кулакоў і райвыканкамам прымаецца адпаведнае рашэнне.
У летні перыяд грамадзяне звяртаюцца за даведкай для продажу сельскагаспадарчай прадукцыі. І хоць тэрмін выдачы падобнай даведкі складае пяць дзён, мы імкнёмся выдаць яе ў дзень звароту, разумеючы становішча чалавека. Вядома, што нядаўна сабраныя ягады не могуць доўга захоўвацца ў спёку, іх пажадана рэалізаваць тэрмінова. Аднак тут ёсць свая спецыфіка. Калі чалавек просіць дазвол на продаж некалькіх вёдраў ягад, сумненняў у тым, што гэта прадукцыя вырашчана ім асабіста, не ўзнікае. Калі ж на продаж выстаўляецца некалькі тон прадукцыі, з’яўляецца насцярожанасць — магчыма, чалавек такім чынам спрабуе незаконна заняцца прадпрымальніцкай дзейнасцю. У такім выпадку мы разам са спецыялістамі Інспекцыі Міністэрства па падатках і зборах робім праверку, аглядаем зямельны ўчастак гаспадара. Калі факт наяўнасці зямельнага ўчастка адпаведнага памеру пацвярджаецца, мы, безумоўна, выдаём патрэбны дакумент. Ва ўраджайны год за такімі даведкамі ў сярэднім за дзень звяртаюцца каля 25 чалавек.
— Упэўнена, што ў вашай практыцы нярэдка сустракаюцца выпадкі, калі чалавек апынуўся ў складаным становішчы. І тут вельмі важна быць не толькі юрыстам, а і добрым псіхолагам…
— Падобныя пытанні ўзнікаюць нярэдка. Грамадзяне рэгіструюць дагавор найму прыватнага жыллёвага фонду і рэгіструюць у сваім жылым памяшканні чалавека на пяць — дзесяць год. Аднак праз некаторы час наймальнік памяшкання пакідае горад, гаспадар дома або кватэры не ведае аб яго месцазнаходжанні, але павінен на працягу некалькіх год плаціць падатак за здачу жылога памяшкання. Таму сваім кліентам раім не заключаць дагавор найму на працяглы тэрмін, каб пазбегнуць непрыемнасцей.
Трэба адзначыць, што згодна з Указам Прэзідэнта Рэспублікі Беларусь №246 з 30 мая бягучага года ўведзены новы парадак рэгістрацыі найму жылых памяшканняў. Так, грамадзяне не маюць права афармляць дагавор найму, калі іх жылыя памяшканні былі пабудаваны або набыты за кошт ільготнага крэдыту.
Вядома, што ў раёне нямала сем’яў, якім патрэбна жылплошча. З гэтай мэтай прадастаўляецца арэнднае жыллё ў вёсках Заслонава і Межыца. Гэта значыць, штомесяц, акрамя аплаты камунальных паслуг, наймальнік будзе павінен заплаціць кошт арэнды памяшкання, сума даволі прымальная. Такім чынам пажадалі мець жыллё многія жыхары нашага раёна.
Наша размова з юрыстам спыняецца. У кабінет увайшоў чарговы наведвальнік. Яўгену Пшонку неабходна атрымаць інфармацыю з Адзінага дзяржаўнага рэгістра юрыдычных асоб і індывідуальных прадпрымальнікаў. Паліна Вячаславаўна прапаноўвае кліенту напісаць заяву, расказвае аб парадку, тэрміне яе разгляду.
Шчыра дзякую спецыялістам сектара “адно акно” за змястоўную размову і жадаю паспяховага працоўнага дня. Наперадзе ў іх — шмат неадкладных спраў.
Святлана СІЛЬВАНОВІЧ.
На здымку: юрыст Паліна Плюгач прымае наведвлаьніка Яўгена Пшонку.
Фота аўтара.