Летні расклад
Лета не за гарамі. Аб планах адпачынку, аздараўлення дзяцей і падлеткаў распавядае Галіна Гарбёнак, метадыст аддзела адукацыі райвыканкама, якая курыруе гэтыя пытанні.
— Галіна Уладзіміраўна, ці ёсць сёлета нешта новае ў арганізацыі летняга адпачынку школьнікаў?
— Ёсць і новае, але пачнем, бадай, з традыцыйных формаў. Найперш гэта арганізацыя трохтыднёвых дзённых аздараўленчых летнікаў, якія будуць адкрыты пры большасці навучальных устаноў. У сельскай мясцовасці — пры Баброўскай, Заслонаўскай, Горскай, Домжарыцкай, Старалядненскай, Новавалосавіцкай…
…Поўсвіжскай, Пышнянскай, Стайскай, Старалепельскай, Бароўскай, Слабадской і Каменскай школах, у горадзе — на базе ўсіх школ і гімназіі імя І. Ерашова, а таксама Цэнтра карэкцыйна-развіццёвага навучання і рэабілітацыі.
— На якую колькасць вучняў разлічаны гэтыя летнікі і калі яны пачнуць працу?
— Колькасць у кожнай навучальнай установе розная, у залежнасці ад таго, колькі дзяцей у школе і колькі выкажа жаданне. Самыя вялікія летнікі, па восемдзесят чалавек, плануецца адкрыць у гімназіі і Заслонаўскай сярэдняй школе. Самыя маленькія будуць у Новых Валосавічах (пятнаццаць чалавек) і карэкцыйным цэнтры (дзесяць). Усяго ж такой формай адпачынку плануецца ахапіць 620 дзяцей. Летнікі пачнуць працаваць ужо з трэцяга чэрвеня.
— Ці будуць працаваць кругласутачныя летнікі?
— Будуць. У Бароўцы і Матырыне. Бароўка плануе прыняць дзве змены, па сто дваццаць чалавек кожная. Першая пачнецца 16 чэрвеня і скончыцца 3 ліпеня. А праз чатыры дні будзе заезд другой, якая працягнецца да 24 ліпеня. У Матырыне ў кругласутачным летніку плануецца арганізаваць адну змену, на якой адпачне 115 дзяцей. Усяго кругласутачнай формай адпачынку будзе ахоплена 355 чалавек.
— А колькі каштуе адзін дзень знаходжання ў такім летніку?
— Восемдзесят шэсць тысяч рублёў. Такім чынам, у цэлым знаходжанне аднаго чалавека будзе каштаваць 1 мільён 566 тысяч, 900 тысяч кампенсуе дзяржава. Астатнія 666 тысяч мусяць заплаціць бацькі. Гэта нямнога, калі ўлічыць, што дзіця будзе амаль месяц пад доглядам, пры пэўным занятку, будзе атрымліваць паўнацэннае каларыйнае вітамінізаванае харчаванне?
— Ці плануецца арганізацыя профільных аздараўленчых летнікаў?
— Профільны будзе арганізаваны ў горадзе ў жніўні на базе раённага цэнтра дзяцей і моладзі, разлічаны ён на дваццаць чалавек. Акрамя таго, у Бароўцы ў пачатку чэрвеня пачне працаваць вучэбна-аздараўленчы летнік “Патрыёт”, дзе будуць праходзіць дапрызыўную падрыхтоўку і адпачываць трыццаць старшакласнікаў школ раёна.
— Дзе змогуць адпачыць дзеці з так званых праблемных сем’яў і праблемныя падлеткі?
— Па-першае, яны будуць актыўна задзейнічаны ва ўсіх формах адпачынку, як дзённай, так і кругласутачнай. Акрамя таго, у бароўскім летніку традыцыйна арганізоўваецца ваенна-патрыятычны атрад.
— Чым будуць займацца дзеці ў летніках — толькі адпачываць ці і працаваць?
— Сёлета ўпершыню на базе чатырох школ — у СШ №3 і СШ №4, а таксама ў Заслонаве і Слабадзе — адкрыюцца летнікі працы і адпачынку. Гэта і ёсць той новы элемент у сёлетнім летнім аздараўленні дзяцей. У Заслонаве ЛПА будзе працаваць кругласутачна на працягу дзевяці дзён, разлічаны на пятнаццаць чалавек. У астатніх школах гэта будуць трохтыднёвыя працоўныя летнікі дзённага знаходжання, разлічаныя на дзесяць чалавек. Форма адпачынку новая, наколькі яна сябе апраўдае, пакажа час.
Гутарыў Уладзімір МІХНО.
