Па зніжаных цэнах
Скончылася вясна. Падводзіць вынікі вясенняга сезона і дзеліцца планамі на летні перыяд дырэктар філіяла “Кааппрамгандаль” раённага спажывецкага таварыства Марына Дзядзюра.
— Марына Пятроўна, як ідзе гандаль сёлета?
— За чатыры месяцы тэмпы рознічнага таваразвароту склалі 106,7 працэнта, у грашовым выражэнні — пяць мільярдаў сто восемдзесят восем з паловай мільёнаў рублёў.
— Спрацавалі быццам бы няблага…
— Яно так, але і не зусім, калі ўлічыць, што нам сёлета былі перададзены яшчэ два магазіны “Усё для дома”.
Рэшткі тавараў на прылаўках — на суму 7 мільярдаў 265 мільёнаў рублёў. Гэта лічба на першага мая, яна роўная 167 дням таваразвароту пры норме 60 дзён.
— Якія меры прымаеце для рэалізацыі рэшткаў тавараў?
— Праводзім усемагчымыя акцыі, у чым нам дапамагаюць і вытворцы. Напрыклад, Мінская швейная фабрыка “Элема” прадае свой тавар са зніжкамі на трыццаць працэнтаў да канца мая. Гэта ў асноўным вясенні асартымент (курткі, плашчы і г.д.). Крыху раней па зніжаных цэнах адпускала тавар Салігорская фабрыка “Калінка”. Часта ўцэньвае тавары і Мінскі Цэнтр моды.
— Ці практыкуеце яшчэ якія формы рэалізацыі тавараў па зніжаных цэнах?
— Адна з такіх формаў — рэалізацыя тавараў поўнапайшчыкам па льготных цэнах. Гэтая катэгорыя пакупнікоў набывае тавары са зніжкай 16,67 працэнта, на дзіцячы асартымент зніжка складае 9,09 працэнта.
— Як выкарыстоўваюцца гэтыя грошы?
— Яны ідуць на развіццё спажывецкай кааперацыі, дакладней — на папаўненне яе ўласных зваротных сродкаў.
— У якіх магазінах пайшчыкі могуць набываць тавары?
— У Лепелі — у магазінах “Усё для дома”, “Універмаг”, “Будматэрыялы”, “Мэбля”, “Майстар”, “Родны кут”, а таксама ў прамтаварных магазінах Каменя, Заслонава.
— Але ж “Родны кут” — магазін прадуктовы.
— На прадуктовыя тавары зніжка крыху іншая — ад дзевяці да шаснаццаці працэнтаў, з улікам падатку на дадатковы кошт.
— Ці практыкуеце абмен заляжалага асартыменту на навейшы?
— Так. Сёлета заменена асартыменту на іншы, сезонны, на суму 560 мільёнаў рублёў. У асноўным гэта швейныя вырабы, нерэалізаваныя цягам дзевяноста дзён.
— Як гандаль падрыхтаваўся да летняга сезона?
— Закупілі вырабаў з ільну на суму 110 мільёнаў рублёў, карыстаюцца попытам тэкстыль, пасцельная бялізна. Летам бываюць запатрабаваныя таксама тавары для заняткаў спортам і турызмам, розныя прэпараты ад камароў, мошак, мух і г.д. Такога тавару маем у дастатковай колькасці. У маі прадалі ўжо тры лодкі — дзве трохмесныя і адну двухмесную, каля дзясятка спальных мяхоў, пяць палатак.
— Як забяспечаны прамысловымі таварамі вясковыя магазіны?
— Асноўны асартымент штодзённага попыту — у дастатковай колькасці. Тавары ж, якія карыстаюцца меншым попытам, дзеля таго, каб яны там не заляжаліся, завозім па заказе.
Гутарыў
Уладзімір МІХНО.