Сацыяльны барометр

У райвыканкаме, яго структурных падраздзяленнях прымаюцца арганізацыйныя і практычныя меры па аператыўным вырашэнні сацыяльна-значных праблем насельніцтва, дэбюракратызацыі дзяржаўнага апарату. Новыя формы работы дазваляюць грамадзянам аператыўна вырашаць паўсядзённыя пытанні, атрымліваць больш інфармацыі аб дзейнасці дзяржаўных органаў. У раённым выканаўчым камітэце працуе тэлефон «гарачай лініі», рэгулярна праводзяцца “прамыя тэлефонныя лініі», дзейнічае грамадская прыёмная, праводзіцца асабісты і выязны прыём грамадзян.

 Аб захадах па задавальненні сацыяльных запытанняў лепяльчан гутарым з кіраўніком спраў райвыканкама Васілём Палонскім.

— Пачну нашу размову з такой інфармацыі. У першым паўгоддзі 2013 года ў райвыканкам паступіла 139 зваротаў грамадзян, з іх 89 — пісьмовых і 50 — вусных, 9 зваротаў ад юрыдычных асоб.

 Колькасць іх у параўнанні з аналагічным перыядам 2012 года павялічылася на сем, а пісьмовых скарацілася на два.

 — Васіль Іванавіч, якую тэндэнцыю засведчыў тэматычны аналіз? На якія арганізацыі найбольш скардзяцца люді?

 — Па-ранейшаму паступае вялікая колькасць зваротаў наконт работы жыллёва-камунальнай гаспадаркі, па жыллёваму заканадаўству.

  Асобна выдзелю звароты са сферы адукацыі.

 — З чым гэта звязана?

 —  З рамонтам дзіцячых садкоў №№6, 8 г. Лепеля і в. Бароўка.

 І тут акурат дарэчы даць такую даведку: сёлета на абуладкаванне дзіцячых дашкольных устаноў у бюджэце закладзена ўсяго 99,7 млн рублёў, з іх асвоена 47,1 млн на бягучы рамонт. Летась было асвоена 441,3 млн рублёў на бягучы і 83,3 млн на капітальны рамонт.

 — Ці паступалі калектыўныя звароты?

 — Паступалі. З 18-ці чатыры  мелі  30 і больш  подпісаў. Усе разгледжаны з выездам на месца. У тым ліку і ліст бацькоў аб неабходнасці рамонту дашкольнай установы ў Бароўцы. У першым паўгоддзі набыты і ўстаноўлены камплектуючыя для сантэхнічнага абсталявання на суму 2277968 млн руб. Куплена тканіна для пашыву пасцельнай бялізны на суму 1671000 руб. Набыццё будаўні­чых матэрыялаў для давядзення да ладу падлогі і рэканструкцыя вентыляцыйнай сістэмы на харчовым блоку плануецца за кошт мясцовага бюджэту да 1 верасня 2013 года.

 — Атрымлівалі іншыя калектыўныя скаргі? Якая тэматыка іх?

 — Калектыўны зварот жыхароў дамоў 80 і 80а па вул. Калі­ніна, 84, 84а па вул. Чуйкова датычыўся дэмантажу турнікета, што абмяжоўваў скразны праезд транспартных сродкаў ад вуліцы Інтэрнацыянальная да вуліцы Ульянка праз мікрараён. У сакавіку было праве­дзена анкетаванне жыхароў вышэйзгаданых дамоў, аднак прыйсці да агульнага пункту гледжання  не атрымалася, бо меркаванні жыхароў падзяліліся пароўну. У выніку вырашана пакінуць турнікет на ранейшым месцы.

 Экалагічнай абстаноўкі датычылася скарга жыхароў Бароўкі…

 — У чым яе сутнасць?

  — Не задавальнялі людзей выкіды ў атмасферу прадуктаў гарэння з кацельні КУВП «Бароўка». Вытворцам катлоў —  Віцебскім даччыным унітарным камунальным вытворчым прадпрыемствам кацельных і цеплавых сетак ухіляюцца недахопы, выяўленыя ў працэсе пусканаладачных работ. Зварот на кантролі да 1 верасня 2013 года.

 Група лепяльчан з вуліцы Савецкая наракала на стан моста  каля возера Лепельскае. Збудаванне абследавана, вызначаны пералік работ па бягучым рамонце.

 — Васіль Іванавіч, колькі наогул зваротаў кантралявалася ў першым паўгоддзі?

 — На кантролі знаходзілася 62 звароты, з іх 18 выканана, зараз кантралюем ход рэалізацыі 44.

 — Давайце канкрэтызуем гэтыя лічбы, так бы мовіць, заземлім іх…

  — Зразумела. Пераважна гэта пытанні, для вырашэння якіх патрабуюцца значныя фінансавыя сродкі. Маюцца на ўвазе капітальны рамонт дома 38 па вул. Інтэрнацыянальная; будаўніцтва водаправода па вуліцы Залінейная, Першамайская, зав. Цяплічны ў г. Лепель, вул. Савецкая ў в. Стаі; рамонт дзіцячых садкоў №№6, 8 у г. Лепель, у в. Бароўка; узвядзенне дамбы ўздоўж ракі Ула.

 — Мне, як члену раённага выканаўчага камітэта, добра вядома, што, паводле рашэння райвыканкама  ад 18 сакавіка 2013 №300 “Аб зацвярджэнні мерапрыемстваў па добраўпарадкаванні», зацверджаны мерапрыемствы па навядзенні парадку ў Лепелі, в. Бароўка і Заслонаве, іншых населеных пунктах на 2013 год. У дакумент уключаны і пытанні, якія стаяць на працяглым кантролі…

 Лагічна скіраваць ланцужок нашых разважанняў у рэчышча зваротаў грамадзян у вышэйстаячыя органы…

 — Зарэгістраваны і такія. Не сакрэт, узрасла колькасць зваротаў у Віцебскі аблвыканкам на шэсць. На разгляд па кампетэнцыі з вышэйстаячых органаў у райвыканкам паступіла дзевяць зваротаў — на адзін менш за аналагічны перыяд 2012 года.

 У Адміністрацыю Прэзідэнта Рэспублікі Беларусь звяртаўся грамадзянін В.П. Турлай з аграгарадка  Старое Лядна, які абскарджваў дзеянні дырэктара ААТ «Лядна». Камісіяй райсельгасхарчу правераны выкла­дзеныя факты, у дзеяннях дырэктара парушэнняў не выяўлена.

 В.Н. Балотнік з в. Пышна пісаў  ў Адміністрацыю Прэзідэнта Рэспублікі Беларусь наконт неабходнасці навядзення парадку на тэрыторыі СФГ «Азім­ка». Кіраўнік гаспадаркі Г.В. Лявіцкі папярэджаны аб адказнасці за парадак на сельскагаспадарчых аб’ектах…

 На асабістых прыёмах кіраў­ніцтвам выканкама ў першым паўгоддзі прынята 50 грамадзян,  старшынёй райвыканкама — 34 чалавекі.

  Выязныя прыёмы насельніцтва горада праводзяцца ў дні выезду інфармацыйных груп, кіраўнікамі якіх з’яўляюцца старшыня райвыканкама, намеснікі старшыні, кіраўнік спраў, старшыня райсавета і іншыя адказныя работнікі.

 На вёсцы выязныя прыёмы практыкуюцца штомесяц за га­дзіну да пачатку пасяджэння сельвыканкама. Усяго за першае  паўгоддзе 2013 года прынята сем чалавек.

 Распараджэннем старшыні райвыканкама ад 9 жніўня 2011 года №233-р зацверджаны графік работы грамадскай прыёмнай, якая працуе ў будынку райвыканкама штодня ў кабінеце №102 юрыдычнага сектара, аддзела па працы са зваротамі грамадзян і юрыдычных асоб.

 — Зараз варта пагаварыць, Васіль Іванавіч, аб новых формах работы, якія дазваляюць грамадзянам аператыўна вырашаць паўсядзённыя пытанні, атрымліваць больш інфармацыі аб дзейнасці раённага выканаўчага камітэта і яго структурных падраздзяленняў. Апошнім часам прыкметна вырасла камп’ютарная пісьменнасць насельніцтва, асабліва моладзі. Камп’ю­тар становіцца незаменным атрыбутам пры стасунках са знешнім светам. Некалькі маніпуляцый на клавіятуры — і ты ўжо на патрэбным сайце. Можаш выказаць свае прапановы, даслаць у органы ўлады электронны зварот…

 — На сайце райвыканкама маецца раздзел для прапаноў грамадзян па ўдасканаленні адмініс­трацыйных працэдур, пытанняў дэбюракратызацыі, а таксама  адмысловыя рубрыкі «Электронныя звароты», «Найбольш часта ўзнімаемыя  ў зваротах грамадзян пытанні». Дарэчы, электронныя разглядаюцца ў адпаведнасці з Законам Рэспублікі Беларусь ад 18 ліпеня 2011 года «Аб зваротах грама­дзян і юрыдычных асоб». За шэсць месяцаў на сайт выканкама паступіла 11 зваротаў грамадзян, усе разгледжаны ва ўстаноўленыя заканадаўствам тэрміны, падрыхтаваны і дадзены адказы на электронны адрас заяўнікаў.

 У райвыканкаме функцыянуе тэлефон «гарачай лініі». «Прамыя тэлефонныя лініі» кіраў­ніцтва райвыканкама праводзяцца адзін раз у два месяцы, аб чым насельніцтва інфармуецца праз газету “Лепельскі край» і сайт райвыканкама. Падчас тэлефанаванняў паступі­ла сем зваротаў, з іх тры па пытаннях жыллёва-камунальнай гаспадаркі, два — аховы здароўя,­ па адным наконт жыллёвага заканадаўства і пераразліку пенсіі.

 — У «Лепельскім краі» публікуюцца і анонсы аб прыёме грамадзян пасадавымі асобамі іншых дзяржаўных органаў…

 —  «Прамыя тэлефонныя лініі» і прыём грамадзян у райвыканкаме вялі Міністр па падатках і зборах Рэспублікі Беларусь В.Н. Палуян, намеснік старшыні Камітэта дзяржаўнага кантролю Віцебскай вобласці В.В. Заранкін, начальнік упраўлення арганізацыйна-кадравай работы Віцебскага аблвыканкама В.Н. Севярын, старшыня камітэта па архітэктуры і будаўніцтву Віцебскага аблвыканкама В.Н. Белавус, дэпутат Палаты прадстаўнікоў Нацыянальнага сходу Рэспублікі Беларусь П.Г. Шыкшнян, старшыня Віцебскага абласнога суда Н.Н. Хамічонак.

 На ўсе пытанні дадзены тлумачэнні або пісьмовыя адказы.

 — Адзіныя дні інфармавання насельніцтва выяўляюць узаемаадносіны ўлады і народа, папярэджваецца незадаволенасць насельніцтва па той ці іншай праблеме. Узнятыя пытанні вырашаюцца аператыўна,  людзі пераконваюцца ва ўважлівым стаўленні кіраўнікоў да іх праблем. Неаднойчы выязджаў у скла­дзе групы і аўтар гэтых радкоў. Пасля выступлення дакладчыка па пэўнай тэме ад прысутных паступалі прапановы і скаргі па розных аспектах сацыяльнага быцця. На многія ­ўдзельнікі адразу атрымлівалі канкрэтныя адказы, калі і што будзе зроблена. Асобныя тэмы патрабавалі дадатковай прапрацоўкі, фінансавых укладанняў, таму браўся тайм-аўт. Пасля грамадзянін інфармаваўся наконт вырашэння зададзенага пытання альбо перспектыў яго рэалізацыі. Такім чынам на месцы ліквідоў­ваўся ачаг незадаволенасці. Прафілактычны рычаг удала спрацоўваў, бо быў напоўнены канкрэтным зместам.

 — Згодзен, эфектыўнасць такіх надзённых дыялогаў відавочная. У раёне створана дзевяць інфармацыйна-прапагандысцкіх груп (ІПГ) райвыканкама, 11 — сельскіх Саветаў і 58 груп прадпрыемстваў і арганізацый. ІПГ райвыканкама ўзначальваюць старшыня райвыканкама, намеснікі старшыні, кіраўнікі структурных падраздзяленняў райвыканкама. За шэсць месяцаў праведзена 426 сустрэч, з іх 52 — ІПГ райвыканкама. Паступіла 216 пытанняў і крытычных заўваг, на якія дадзены тлумачэнні.

 Колькасць зваротаў ад жыхароў вёскі ў райвыканкам у першым паўгоддзі зменшылася на сем. Увогуле датычыліся яны  жыллёва-камунальнай гаспадаркі, жыллёвага заканадаўства, працаўладкавання, землеўпарадкавання і землекарыстання, транспартных паслуг, газіфікацыі, адукацыі, законнасці і правапарадку… Больш за ўсё зваротаў паступіла з Бароўскага, Горскага сельсаветаў. На ўсе  былі дадзены адпаведныя тлумачэнні.

 — Васіль Іванавіч, вяскоўцы апрача райвыканкама і вышэйстаячых арганізацый звяртаюцца за вырашэннем сваіх праблем і ў адпаведныя  сельвыканкамы. Навошта турбаваць іншых начальнікаў, калі свае побач…

 — Такім чынам у сельвыканкамах разгледжана 78 зваротаў грамадзян —  на 39 менш за першае паўгоддзе  2012 года.

 — Мы ўжо закраналі негатыўную тэндэнцыю павелічэння колькасці скаргаў жыхароў Лепельшчыны ў аблвыканкам. Канешне, некаторыя нашы землякі ў абыход мясцовай улады адразу “сігналізуюць наверх”. Здараецца такое ў паўсядзённай практыцы. Працэс не спыніш, калі чалавек так рашуча настроены. Аднак бывае і іначай. Не знаходзіць заяўнік паразумення на мясцовым узроўні. Не задавальняе яго пэўнае рашэнне. Тады бярэцца за пяро і піша ў больш высокую інстанцыю. А гэта ўжо брак у рабоце…

 — Шчыра прызнаю, не зжыты яшчэ факты павярхоўнага разгляду зваротаў і неналежнага выканання сваіх абавязкаў асобнымі адказнымі работнікамі. Да дысцыплінарнай адказнасці прыцягнута адна службовая асоба.

 У Каменскім і Баброўскім сельвыканкамах не замацаваны адказныя за вядзенне справаводства па зваротах грама­дзян і юрыдычных асоб, не былі ўнесены дадзеныя звесткі ў службовыя інструкцыі кіраўнікоў справамі. Агульнымі недахопамі для часткі сельвыканкамаў з’яўляюцца малая колькасць альбо адсутнасць запытаў па адміністрацыйных працэдурах, у журналах рэгістрацыйна-кантрольнай формы рэгістрацыі заяў зацікаўленых асоб запаўняюцца графы з парушэннем патрабаванняў заканадаўства, рэгістрацыя адміністрацыйных працэдур вядзецца з адступленнем ад устаноўленага ўзору. Найменне журналаў не заўсёды  адпавядае ўстаноўленай наменклатуры спраў.

 — Колькі слоў аб адміністрацыйных працэдурах…

 — Структурнымі падраздзяленнямі райвыканкама выканана каля 14003 адміністрацыйных працэдур, у тым ліку сектарам «адно акно» —  1204, сельскімі выканаўчымі камітэтамі — 3806 адміністрацыйных працэдур па заявах грамадзян.

 Дзейнасць структурных падраздзяленняў раённага выканаўчага камітэта з выкарыстаннем праграмнага комплексу «адно акно» была распачата ў 2011 годзе. Па новай тэхналогіі сектарам «адно акно» зарэгістравана 1204 заяў, упраўленнем па працы, занятасці і сацыяльнай абароне — 3008, аддзелам адукацыі — 21. Сельскімі выканаўчымі камітэтамі з агульнай колькасці прынятых у першым паўгоддзі 2013 заяў (3806 заяў) з выкарыстаннем названага праграмнага комплексу зарэгі­стравана 2239 заяў.

 Аналіз зваротаў насельніцтва дазваляе ўладным структурам трымаць руку на пульсе сацыяльнага жыцця, аператыўна прымаць меры, ствараць грамадзянам умовы камфортнага пражывання на пэўнай тэрыторыі.

 Уладзімір ШАЎЧЭНКА.