“Шчаслівыя сем’і ўсе падобныя адна на адну”, — сцвярджаў Леў Талстой
“Шчаслівыя сем’і ўсе падобныя адна на адну”, — сцвярджаў Леў Талстой. Цяжка не пагадзіцца са знакамітым пісьменнікам. Сапраўды, на выставе “Сямейны партрэт”, якая адкрылася ў мастацкім салоне “Скарбонка”, ёсць нейкае падабенства. Гэта сем’і, у якіх пануе лад, каханне і ўзаемаразуменне.
— Творчы праект “Сямейны альбом” — наша ініцыятыва, — распавядае намеснік начальніка аддзела ідэалагічнай работы, культуры і па справах моладзі Тамара Бароха. — Вялікую падтрымку аказалі раённыя аддзяленні Беларускага фонду міру і “Белай Русі”, раённае аб’яднанне прафсаюзаў. Фотавыстава — толькі першы этап. Наведвальнікі мастацкага салона “Скарбонка” ўбачаць шмат сямейных дынастый, якія праслаўлялі і праслаўляюць родную Лепельшчыну. Раённы музей прадставіў гістарычныя фотаздымкі. Партрэтныя калажы зрабіла творчы супрацоўнік раённай бібліятэкі Іна Юшко.
На выставе — сорак фотаальбомаў. Сярод іх дынастыі творцаў, спартсменаў, працаўнікоў сельскай гаспадаркі, медыкаў. Кожны з яркіх і цікавых фотаздымкаў мае сваю гісторыю.
Анатоль Вярцінскі нарадзіўся ў 1931 годзе ў вёсцы Дзямешкава Лепельскага раёна. Закончыў аддзяленне журналістыкі БДУ. Працаваў у рэдакцыях раённых газет у Давыд-Гарадку, Камянцы, Клімавічах, Рагачове. Быў галоўным рэдактарам газеты “Літаратура і мастацтва”. Сакратар праўлення Саюза пісьменнікаў Беларусі.
Іван Мікалаевіч Будзіч — педагог, знакаміты разьбяр па дрэве. Дзеці Дзмітрый і Ганна таксама звязалі сваё жыццё з творчасцю. Работы творчай суполкі можна ўбачыць не толькі ў Беларусі, але і ў Даніі, Германіі, Малдове, Расіі.
Спартыўная сям’я Паповых праславіла родную Лепельшчыну на ўвесь свет. Георгій і Галіна — майстры спорту, трэнеры барацьбы самба і дзюдо. Самбіст Сцяпан Папоў — чэмпіён свету і Еўропы, пераможца Першых Еўрапейскіх ігр у Баку. Аляксей Папоў — знакаміты трэнер.
Сям’я Анікей жыве ў вёсцы Слабада. Маргарыта Васільеўна — настаўніца гісторыі, краязнаўца. Сумесна з пошукавым клубам “Нашчадкі” правяла вялікую работу па перапахаванні ўдзельніка вайны, лётчыка-земляка Мікалая Пшонкі. Гаспадар Мікалай Аляксандравіч трыццаць год адпрацаваў ляснічым у Слабадскім лясніцтве. Узнагароджаны граматай Міністэрства лясной гаспадаркі. Сям’я Анікей выхоўвае двух дзяцей і чатырох унукаў.
Радзіма шматдзетнай сям’і Крыцкіх — вёска Аношкі. У 2009 годзе Валянціна Крыцкая стала жанчынай года Беларусі за значны ўклад па духоўна-маральным адраджэнні народных традыцый у Рэспубліцы Беларусь. Адзін з галоўных захавальнікаў старажытнага аўтэнтычнага свята “Жаніцьба Цярэшкі”. Выхавала дзевяць дзяцей.
Аляксандр Гінель — урач-хірург, намеснік галоўнага ўрача па АПР. Жонка Ірына Аляксандраўна — дзіцячы стаматолаг. Расце сын. Сям’я Гінель актыўна ўдзельнічае ў грамадскіх і спартыўных святах.
Адзначаныя сем’і — толькі маленькая частка вялікага фотаальбома. І няма сумненняў у тым, што скарбонка фотаздымкаў будзе паступова папаўняцца.
Я. МІКАЛАЕЎ.
На здымку: сям’я Будзічаў каля свайго сямейнага фотаальбома.