Міліцэйская хроніка

Цана няўважлівасці — мільён

У адзін з сакавіцкіх дзён злодзей зрабіў падарунак сабе: з прыватнай крамы, размешчанай па вуліцы Чуйкова, 50А, сярод белага дня скраў электрадрыль. Яму паспрыяла адна абставіна — няўважлівасць прадаўца, які не адразу заўважыў прапажу. 994 тысячы рублёў — цана электраінструмента. І няўважлівасці.

Слоікі з агароднінай

Мажліва, надта прагаладаўся жыхар Бароўкі, бо палез у падвал шматкватэрнага дома, каб украсці некалькі слоікаў з кансерваванай агароднінай.

А можа проста не было чым закусіць: грошы на віно знайшоў, на закусь — не.

Пасля паўгадовага роздуму

У лютым у дзяжурную часць РАУС звярнуўся індывідуальны прадпрымальнік з Бароўкі з заявай аб тым, што з яго гандлёвага павільёна злодзей скраў акумулятар. Супрацоўнікі міліцыі знайшлі зламыснікаў. Крадзеж учынілі жыхар Бароўкі і вясковец з Залучына.

Пад покрывам ночы

У міліцыю звярнуўся жыхар Баброва, паведаміў, што ў сакавіку нехта выставіў шыбу ў яго доме, залез і вынес мабільны тэлефон і электрапілу. Агульная сума ўрону склала 1,2 мільёна рублёў.

Чатыры ноўтбукі

За апошнія гады гандлёвая кропка “Ультратэк” некалькі разоў была аб’ектам атак начных злачынцаў. У ноч на 11 сакавіка набег паўтарыўся, невядомы вынес чатыры ноўтбукі. Здаецца, што ўладальнікі гандлёвага павільёна не робяць ніякіх высноў, а злодзеі заходзяць туды як да сябе дахаты.

Мялі, млынок

Спакойна стаяў сабе ў двары прыватнага дома ў Стаях самаробны млынок. Гаспадыня з яго дапамогай здрабняла збожжа для гаспадарчых патрэб. Прылада спадабалася двум непрацуючым мужыкам, братам 1970 і 1970 гадоў нараджэння. Скралі млынок, нанёсшы гаспадыні ўрон, які тая ацаніла ў мільён рублёў. Міліцыянеры злодзеяў выкрылі хутка. Заведзена крымінальная справа.

Небяспечныя госці

12 сакавіка ў РАУС звярнулася жыхарка Домжарыцаў, пенсіянерка, якая заявіла, што напярэдадні ўвечары ў яе доме гасцяваў знаёмы, а пасля гаспадыня выявіла прапажу 450 тысяч рублёў. На чужыя грошы паквапіўся раней ужо судзімы аднавясковец.
У іншым выпадку лепяльчанка, пенсіянерка мала што пусціла патэнцыйнага злодзея ў свой дом, дык яшчэ і распівала з ім спіртное. Чаму тады здзіўляцца, што пасля яго візіту знікла сто тысяч рублёў?

Электрадрыль з альтанкі

Працаваў жыхар Чарэйшчыны ў сваім двары, свідраваў электрадрылем. Як завяршыў справу, паклаў яго ў альтанцы. Праз некаторы час прыйшоў — інструмента і сляды астылі. Высветлена, што крадзеж учыніў непрацуючы аднавясковец. Супраць яго ўзбуджана крымінальная справа.

Дзве муфты

З СВФ “Заазер’е” паведамілі, што з мехдвара ў Юркоўшчыне былі ўкрадзены дзве трактарныя абгонныя муфты коштам больш за два мільёны рублёў. Крадзеж учыніў непрацуючы жыхар гэтай жа вёскі, 1967 года нараджэння. Меркаваў здаць на металалом.
Паводле паведамленняў РАУС.