Пульс Лепельщины
Пасадзілі кляновую алею
Сто дваццаць клёнікаў было пасаджана ў Заслонаве. Ініцыятыва азелянення належала мясцоваму сельсавету. Парасткі дрэўцаў па дамоўленасці былі выкапаны на тэрыторыі дзяржпрафліцэя, які прадаставіў іх бясплатна. У пасадцы поруч з работнікамі КУВП “Бароўка” бралі ўдзел вучні ваенна-патрыятычнага класа Заслонаўскай школы.
Каб не псавалі выгляд вёсак
Штогод па плане добраўпарадкавання ў вёсках сельсавета разбіраюць старыя спарахнелыя безгаспадарчыя пабудовы.
Летась на цэнтральнай сядзібе былі дэманціраваны дзве хаты, сёлета плануецца зліквідаваць тры хаты ў Караевічах.
Сякуць кусты, платы гародзяць
З надыходам вясны на тэрыторыі сельсавета прыступілі да высечкі кустоўя, у вёсках гародзяць платы. Многія работы праводзяцца з дапамогай шэфаў. Актыўна наводзіць парадак у вёсцы Паляны калектыў аблпсіхбальніцы. На гэты год запланавана будаўніцтва і афарбоўка плоту ў вёсцы Бораўна працягласцю 1281 метр. Работы будуць выконвацца за кошт бюджэту сельсавета і сродкаў, выдзеленых цэнтрам занятасці насельніцтва.
Папрацуюць у аграгарадку
Шмат плануецца зрабіць сёлета дзеля добраўпарадкавання аграгарадка. У Горках адрамантуюць паўкіламетра плоту, зліквідуюць несанкцыянаваную звалку ў раёне былога міні-палігона, пабеляць аўтапавільён на прыпынку, навядуць парадак на могілках. Каля аб’ектаў сацкультбыту, школы, дзіцячага садка, магазіна, аддзялення сувязі вырастуць кветкі, якія пачалі ўжо высаджваць на клумбы. Работы будуць праводзіцца сіламі дарожных службаў, работнікаў КУВП “Бароўка”, мясцовага насельніцтва.
Віктар ЛЯШЧЫНА.