Трэці тысячнік
Аб тым, што ў нашым раёне ўжо ёсць трэці камбайнер-тысячнік, я даведалася ад старшыні раённай арганізацыі прафсаюза работнікаў аграпрамысловага комплексу Сяргея Марціновіча.
— У якой гаспадарцы працуе механізатар?
— У ААТ “Чарэйшчына”.
— Не сумняваюся, што гэта Сяргей Плігаўка.
— Так яно і ёсць.
Сяргей Анатольевіч лідзіруе сярод камбайнераў, намалочвае тысячу тон збожжа адным з першых у раёне ўжо не першы год.
Для таго, каб павіншаваць механізатара з тысячным намалотам, гаспадарку наведалі першы намеснік старшыні райвыканкама Барыс Яфрэмаў і старшыня раённай арганізацыі прафсаюза работнікаў АПК Сяргей Марціновіч. На механізаваным двары нас сустрэў дырэктар ААТ “Чарэйшчына” Міхаіл Мільчанін.
— Гаспадарка забяспечана выдатнай тэхнікай, ды і сярод механізатараў у асноўным вопытныя, адказныя работнікі, якія аддалі рабоце ў гаспадарцы не адзін дзясятак год. Крыху больш як за дваццаць дзён асноўны масіў збожжа быў убраны. Можна з упэўненасцю сказаць, што ўраджай збожжа вырашчаны багаты.
Камбайнер Сяргей Плігаўка сваю справу ведае. Бездакорнай працай, руплівасцю і самаадданасцю ён паказвае выдатны прыклад маладому пакаленню.
Сяргей Плігаўка разам са сваім маладым памочнікам Артурам Драздовым завіхаліся ля камбайна на механізаваным двары.
— Вялікі дзякуй за вашу добрасумленную працу, адказнасць і прафесіяналізм. Выдатна, што ў нашым раёне ёсць такія працаўнікі, — звяртаецца да Сяргея Анатольевіча Барыс Яфрэмаў. Гвардзейцу жніва ён уручыў Ганаровую грамату і грашовую прэмію ў памеры аднаго мільёна рублёў. Падарункі ад імя раённай арганізацыі прафсаюза работнікаў АПК падрыхтаваў працаўнікам Сяргей Марціновіч. Перадавікі атрымалі мабільныя тэлефоны, кепкі і майкі. Акрамя таго, Сяргею Анатольевічу быў уручаны сцяжок перадавіка.
Ад душы павіншаваў руплівых работнікаў гаспадаркі таксама дырэктар ААТ “Чарэйшчына” Міхаіл Мільчанін. Разам з найлепшымі пажаданнямі камбайнерам ён падарыў электрадрэлі.
Сяргей Плігаўка працуе ў сельскай гаспадарцы з 1990 года. У калгас імя Дзімітрава прыйшоў працаваць пасля заканчэння Лепельскага прафесійна-тэхнічнага вучылішча №175.
Трэці сезон камбайнер рупіцца на КЗС-1218.
— Ніякіх праблем у рабоце ніколі не ўзнікала, — адзначае Сяргей Анатольевіч. — Камбайн працуе выдатна, кабіна аснашчана кандыцыянерам. За працай час заўсёды прабягае хутка.
— Колькі звычайна доўжыўся ваш працоўны дзень?
— Пачынаў працу ў 6.30 — сем гадзін раніцы і завяршаў у 0.00 — адну гадзіну раніцы, у рэдкіх выпадках працаваў да 22 гадзін.
— Сяргей Анатольевіч, вы ўжо не першы год з’яўляецеся перадавіком. Памятаеце, калі ўпершыню дасягнулі лепшага паказчыка ў раёне?
— У 1993 годзе, калі працаваў на “Доне-1500”.
— Магчыма, вашы дзеці па добрым прыкладзе пойдуць працаваць у сельскую гаспадарку?
— Магчыма. Пакуль яны дапамагаюць нам з жонкай спраўляцца па гаспадарцы. Старэйшы, Віталь, сёлета пойдзе ў сёмы клас, а малодшы, Кірыл, — трэцякласнік.
Памочнік Сяргея Анатольевіча Артур Драздоў у ААТ “Чарэйшчына” працуе другі месяц, пасля заканчэння Лепельскага дзяржаўнага прафесійнага ліцэя. Тут хлопец набыў тры спецыяльнасці: слесара, трактарыста-машыніста і муляра. Сам жа родам з вёскі Стараселле.
— Збіраецеся і далей працаваць у гэтай гаспадарцы?
— Вырашыў удасканаліць сваю прафесійную падрыхтоўку ў Віцебскім станкабудаўнічым каледжы па спецыяльнасці “тэхнік-тэхнолаг”…
Святлана СІЛЬВАНОВІЧ.
На здымку: першы намеснік старшыні райвыканкама Барыс Яфрэмаў уручае заслужаную ўзнагароду камбайнеру-тысячніку Сяргею Плігаўку.
Фота аўтара.