Цукеркі і зялёны партфель
Арына Гаўрылава, шасцікласніца СШ №1, была адной з тых дваццаці пяці шчасліўцаў, якія трапілі на навагоднюю ёлку ў Віцебску, дзе прысутнічаў старшыня аблвыканкама Аляксандр Косінец.
Зімовыя канікулы Арына правяла пераважна дома — крыху малявала, крыху гуляла на камп’ютары. Дома ў Гаўрылавых стаіць вялікая і прыгожая ёлка, шмат навагодніх падарункаў, сярод якіх і цукеркі, прывезеныя з
навагодняга свята ў Віцебску, багата мяккіх цацак, да якіх зараз дабавіўся і прыгожы дракончык. Гэта памяць пра “губернатарскую ёлку”, якую дзяўчынка запомніць надоўга.
— Напачатку нам падарылі мяккія цацкі, — распавядае Арына. — Мне дастаўся вось гэты дракоша. Затым павялі ў вялікую канцэртную залу. Перад намі выступіў губернатар. А пасля пачалася казка.
— Цікавая?
— Я такога цікавага прадстаўлення яшчэ ніколі не бачыла. Гэта былі прыгоды хлопчыка і дзяўчынкі, на шляху якіх паўставалі перашкоды. Іх трэба было пераадольваць. Змагаліся дабро і зло, выкрываліся чалавечыя заганы — сквапнасць, маладушша, хітрасць, ліслівасць, мана, хамства.
— Якія яшчэ падарункі ты атрымала?
— Вялікі набор цукерак і зялёны партфель.
— У класе, напэўна, табе будуць зайздросціць?
— Не, у нас добры клас, амаль усе дзяўчынкі, толькі пяць хлопчыкаў. Мы сябруем і ніколі не зайздросцім адзін аднаму.
— І хлопчыкаў не крыўдзіце? Але яны павінны баяцца, бо, ведаю, ты ходзіш у секцыю па дзюдо.
Арына ўсміхаецца:
— Так, хадзіла пяць гадоў, але мне болей падабаюцца лыжы і канькі. Мы з татам ходзім зімою на лыжню, а летам раніцай робім прабежку.
— Спорт не замінае вучобе? Напэўна, ты выдатніца, калі трапіла ў лік тых, хто ездзіў на “губернатарскую ёлку”?
— Вучуся на дзявяткі і дзясяткі, люблю біялогію, геаграфію, рускую і беларускую мовы, спорт толькі дапамагае вучыцца. А ў Віцебск на ёлку ездзілі не толькі выдатнікі, там былі розныя дзеці, таксама і тыя, у каго няма бацькоў.
— Якія яшчэ ў цябе захапленні?
— Люблю музыку, падабаецца рок, рэп.
— І якая твая любімая група?
— Група “Менхін парк”. А яшчэ мы з мамай любім кулінарнічаць — пячом пірагі, вырабляем розныя фігуркі з цеста.
— Твае любімыя стравы…
— Тыя, якія гатуе мама. У яе вельмі смачныя атрымліваюцца катлеты, пюрэ, салаты розныя…
— То можа будзеш поварам, калі вырасцеш?
— Я яшчэ і не думала, кім буду. Мне падабаецца прафесія ўрача.
— У такім разе твая любімая біялогія і сапраўды табе спатрэбіцца, бо які ж урач не ведае біялогіі. Пад Новы год усе загадвалі жаданні. Што загадала ты?
— Каб родныя і блізкія мне людзі былі здаровыя. Хацелася б і наступны раз паехаць на такую ёлку, на якой мне пашчасціла быць.
Віктар ЛЯШЧЫНА.
На здымку: шасцікласніца СШ №1 Арына Гаўрылава.
Фота аўтара.