Гран-пры на Tallinn-Fest
Прыемная навіна прыйшла з Таліна. Навучэнка Лепельскай дзіцячай школы мастацтваў Яна Стрэльчанка за выкананне двух папулярных эстрадных песень удастоена адзінай галоўнай узнагароды — Гран-пры ў намінацыі “эстрадны вакал-сола” на 5-м Міжнародным конкурсе-фестывалі Tallinn-Fest. Адну з песень Яна выканала на беларускай мове, а другую — на англійскай. Аўтарытэтнае журы высока ацаніла выканаўчае майстэрства, музычную гарманічнасць і харэаграфічную дасканаласць творчасці нашай зямлячкі, узнагародзіла юную спявачку спецыяльным сертыфікатам на бясплатную паездку, яе асабісты ўдзел у Міжнародным конкурсе Paris-Fest, які адбудзецца ў лістападзе 2015 года. Дарэчы, суправаджалі Яну Стрэльчанка ў час паездкі ў Талін яе маці Святлана, а таксама выкладчыца Лепельскай дзіцячай школы мастацтваў Таццяна Мікалаеўна Ермаловіч. Педагог мэтанакіравана працуе, цярпліва ўдасканальвае вакальныя, музычныя і харэаграфічныя здольнасці спявачкі. Таму зусім лагічным было маё пытанне да маці юнай эстраднай зоркі, хто першым заўважыў у дзяўчынкі выключныя прыродныя вакальныя задаткі.
— На гэта першай звярнула ўвагу я, — сказала Святлана Генадзьеўна. — Таму вырашыла параіцца са спецыялістамі Лепельскай дзіцячай школы мастацтваў. Выкладчыца Таццяна Ермаловіч папрасіла прывесці Яну на праслухоўванне. Таццяна Мікалаеўна адразу ацаніла выдатныя вакальныя здольнасці Яны, пачала яшчэ задоўга да афіцыйнага паступлення ў школу мастацтваў індывідуальна з ёй займацца. Ды і зараз Таццяна Ермаловіч праводзіць з Янай шмат дадатковых урокаў, якія не прадугледжаны вучэбнай праграмай. Дзякуй ёй за клопат аб маёй дачцэ, шчырую падтрымку ў час выступленняў Яны ў Таліне, іншых прадстаўнічых форумах міжнароднага і рэспубліканскага ўзроўняў!
— Што найбольш запомнілася на Tallinn-Fest?
— Гледачы і аўтарытэтнае журы цёпла прымалі Яну ў час конкурсных праглядаў і на заключным гала-канцэрце, ганаровае права выступіць на якім было прадастаўлена толькі самым лепшым эстрадным выканаўцам.
Прыемна было і тое, што адкрывалі конкурс-фестываль і былі яго вядучымі на працягу некалькіх дзён вядомыя расійскія спевакі Саці Казанава і Улад Тапалаў. Ганаровымі членамі журы былі эстрадныя аўтарытэты — бацька зоркі расійскай эстрады Філіпа Кіркорава, народны артыст Расіі Бедрас Кіркораў і народны артыст Расійскай Федэрацыі Фарух Рузіматаў. Уразілі і словы старшыні журы — старшага выкладчыка эстрадна-джазавага вакала Санкт-Пецярбургскага дзяржаўнага ўніверсітэта культуры і мастацтваў, педагога па вакале і хармайстра Санкт-Пецярбургскага дзяржаўнага тэатра музычнай камедыі Вольгі Сафронавай, якая пры падвядзенні вынікаў адзначыла, што Яна выканала песні эмацыйна, таленавіта і на высокім прафесійным узроўні, не дапусціла ніводнай памылкі.
— Ці не ўзнікаюць у Яны праблемы з вучобай у агульнаадукацыйнай школе?
— Настаўнікі сярэдняй школы №3, дзе Яна вучыцца ў 7 “А” класе, з разуменнем адносяцца да яе адсутнасці на ўроках па ўважлівых прычынах, дапамагаюць не адстаць з вывучэннем асобных прадметаў. Ды і Яна спрабуе паўсюдна паспець.
— Можа было б лепш, каб Яна пачала займацца ў Мінску са сталічнымі спецыялістамі?
— Выкладчыкі Лепельскай дзіцячай школы мастацтваў — выдатныя спецыялісты. Таццяна Ермаловіч не горшая за любога сталічнага педагога. Зразумела, што ў Мінску маецца больш магчымасцей для “раскруткі”, набыцця большай вядомасці сярод аматараў эстраднай песні. Аднак ці гэта галоўнае для таго, каб у рэшце рэшт можна было стаць знакамітым спеваком?! Наш мясцовы эстрадны выканаўца і кампазітар Аляксандр Балотнік, які стаяў ля вытокаў папулярнага беларускага ансамбля “Бяседа”, зараз жыве і працуе ў Лепелі, аднак, тым не менш, яго творчасць добра вядомая не толькі ў нашай краіне, але і далёка за яе межамі. Ён двойчы толькі ў апошнія гады ўшаноўваўся ў Вялікай зале Палаца Рэспублікі ў Мінску ў прысутнасці тысяч гледачоў, калі ўзнагароджваўся каштоўным прызам — своеасаблівым беларускім “Грэмі”, паколькі яго эстрадны твор уключаўся ў “Залатую калекцыю беларускай песні”, а яго знакамітая песня “Чарка па пасашок” — гэта беларускі хіт на ўсе часы, які заўсёды з задавальненнем слухаюць.
Мікалай ГАРБАЧОЎ.
На здымках: Яна Стрэльчанка разам з народным артыстам Расіі Бедрасам Кіркоравым на сцэне Міжнароднага конкурсу-фестывалю Tallinn-Fest.