Интервью с заместителем председателя Лепельского райисполкома Виктором Азаренком
Аб тым, якую прафесію выбраць у далейшым, многія хлопцы і дзяўчаты задумваюцца ўжо ў школьныя гады. Адны больш глыбока вывучаюць гуманітарныя дысцыпліны, другія — дакладныя, іншых жа цікавяць прадметы хіміка-біялагічнага профілю. Аб арганізацыі профільнага навучання ў сярэдніх школах нашага раёна пойдзе размова ў інтэрв’ю з намеснікам старшыні райвыканкама Віктарам Азаронкам.
— Віктар Уладзіміравіч, вядома, што ў многіх сярэдніх школах нашага раёна створаны профільныя класы і групы…
— Так. У цяперашні час у раёне функцыянуе сем сярэдніх школ, у кожнай з якіх працуюць профільныя класы і групы. 248 навучэнцаў дзявятых — адзінаццатых класаў на павышаным узроўні вывучаюць дзевяць вучэбных прадметаў. Ахоп профільным навучаннем складае 85 працэнтаў у дзясятых і 72 працэнты — у адзінаццатых класах.
— Якім жа чынам устанаўліваецца патрэба ў вывучэнні тых ці іншых дысцыплін?
— Галоўным упраўленнем па адукацыі Віцебскага аблвыканкама пастаўлены задачы па фарміраванні профільных класаў і арганізацыі прафесійнай падрыхтоўкі навучэнцаў пад запыты эканомікі, мінімізацыі колькасці класаў філалагічнага профілю і забеспячэнні эканамічнай мэтазгоднасці арганізацыі профільнага навучання.
Для рэалізацыі пастаўленых задач у кожнай установе адукацыі раёна арганізавана вывучэнне адукацыйных запытаў навучэнцаў, іх законных прадстаўнікоў, вядзецца работа па дапрофільнай падрыхтоўцы. Адкрыццё профіляў ажыццяўляецца пры наяўнасці неабходнай матэрыяльнай базы, інфармацыйных рэсурсаў, а таксама з улікам кадравага патэнцыялу.
У цяперашні час у раёне праведзена значная работа па фарміраванні аптымальнай, кіруемай мадэлі профільнага навучання і прафесійнай падрыхтоўкі.
У 2017 — 2018 навучальным годзе рашэннем Лепельскага райвыканкама для вучняў усіх школ горада і раёна быў адкрыты адзін базавы клас у сярэдняй школе №1 г. Лепеля. Сёлета было прынята рашэнне аб адкрыцці аднаго базавага класа для навучэнцаў усіх школ горада і раёна — як гарадскіх, так і сельскіх на базе СШ №3
г. Лепеля.
Перад прыняццем такога рашэння была праведзена значная падрыхтоўчая работа: аптымізацыя сістэмы адукацыі, дэталёвы аналіз па кожным выпускніку дзявятага класа, разгледжаны магчымасці арганізацыі падвозу навучэнцаў да ўстановы адукацыі і ў зваротным накірунку. Арганізавана сур’ёзная растлумачальная работа з усімі зацікаўленымі асобамі.
Быў атрыманы станоўчы вынік. У цяперашні час у раёне функцыянуе ўсяго адзін базавы дзясяты клас з колькасцю навучэнцаў 21 чалавек. Зведзены да мінімуму базавыя групы ў профільных класах, на фарміраванне якіх ішло нямала часу. Акрамя таго, дадзеныя мэты стымулявалі выпускнікоў дзявятых класаў на атрыманне прафесіі: паступленню ва ўстановы сярэдняй спецыяльнай і прафесійна-тэхнічнай адукацыі, у тым ліку ў Лепельскі дзяржаўны аграрна-тэхнічны каледж. У выніку, калі на працягу шэрага гадоў у дзясятыя класы паступала больш за 60 працэнтаў выпускнікоў дзявятых класаў, сёлета гэты паказчык склаў менш за 55 працэнтаў.
Згодна з вучэбным планам сярэдняй школы з першага верасня 2018 года для вучняў дзясятых класаў арганізаваны адукацыйны працэс па працоўным навучанні па праграме прафесійнай падрыхтоўкі рабочых (служачых). У нашым раёне гэта навучанне арганізавана па III мадэлі: на базе аграрна-тэхнічнага каледжа.
З пісьмовага дазволу законных прадстаўнікоў навучэнцаў заключаны трохбаковыя дагаворы паміж аддзелам па адукацыі, каледжам і навучэнцамі аб прафесійнай падрыхтоўцы на платнай аснове. У каледжы распрацаваны і ўзгоднены з начальнікам аддзела па адукацыі тэматычныя планы па кожнай спецыяльнасці, зацверджаны вучэбныя праграмы. Заняткі праводзяць кваліфікаваныя спецыялісты.
— Па якіх жа спецыяльнасцях вядзецца прафесійнае навучанне?
— Арганізавана навучанне па двух спецыяльнасцях, найбольш запатрабаваных у раёне ў цяперашні час. Юнакі вучацца па спецыяльнасці “Слесар па рамонце сельскагаспадарчых машын і абсталявання” (дзесяць чалавек), а дзяўчаты вучацца па спецыяльнасці “Прадавец” (адзінаццаць навучэнак).
— У расклад школьных прадметаў, вядома, уключана і працоўнае навучанне…
— Так. Гэты прадмет у дзясятым класе ўключаны ў школьны расклад вучэбных заняткаў. Яны праводзяцца два разы ў тыдзень: у панядзелак — дзве гадзіны (з 12.55 да 14.35) і ў суботу — чатыры гадзіны (з 8.00 да 11.30).
Паміж школай і каледжам наладжана цеснае ўзаемадзеянне як па пытаннях арганізацыі адукацыйнага працэсу, так і кантролі за колькасцю наведванняў і паспяховасцю навучэнцаў.
Вучні базавага класа, якія пражываюць у сельскай мясцовасці, дабіраюцца для праходжання прафесійнай падрыхтоўкі на прыгарадным транспарце па даведках устаноўленага ўзору. Адзін навучэнец дастаўляецца на школьным аўтобусе.
— Безумоўна, прафесійна-тэхнічная падрыхтоўка вельмі спатрэбіцца моладзі ў далейшым…
— Лічу, што арганізацыя прафесійнай падрыхтоўкі менавіта III мадэлі (на базе ўстановы сярэдняй спецыяльнай адукацыі) з’яўляецца найбольш эфектыўнай і мэтазгоднай формай. На сённяшні дзень у нашым раёне толькі ў Лепельскім дзяржаўным аграрна-тэхнічным каледжы ёсць уся неабходная вучэбна-матэрыяльная база, прафесійныя кадравыя і метадычныя рэсурсы для эфектыўнай арганізацыі прафесійнага навучання, вытворчай практыкі і атрымання навучэнцамі неабходных практычных навыкаў.
— Такая работа, вядома, будзе працягвацца і ў будучым?
— У наступным навучальным годзе запланавана працягваць навучанне па праграме прафесійнай падрыхтоўкі рабочых (служачых) для навучэнцаў ужо дзясятых і адзінаццатых класаў сярэдніх школ на базе Лепельскага дзяржаўнага аграрна-тэхнічнага каледжа. У раёне будзе адкрыты адзін дзясяты базавы клас для навучэнцаў усіх школ раёна. Прагназуецца, што колькасць вучняў гэтага класа будзе 20 — 25 чалавек. Колькасць профільных класаў у раёне складзе сем, дзе будзе займацца каля 140 вучняў. Перад аддзелам па адукацыі, установамі адукацыі пастаўлена задача максімальна пашырыць ахоп вучняў вывучэннем профільных прадметаў прыродазнаўча-матэматычнага цыклу, мінімізаваўшы пры гэтым філалагічны напрамак. Акрамя таго павінна быць забяспечана рацыянальнае выкарыстанне гадзін для дзялення класаў на профільныя групы, а таксама арганізавана эфектыўная дапрофільная і дапрафесійная падрыхтоўка навучэнцаў на другой ступені агульнай сярэдняй адукацыі.
— Вялікі дзякуй, Віктар Уладзіміравіч, за змястоўную размову.
Інтэрв’ю правяла
Святлана ВАЗНЯК.