Клятва на вернасць Айчыне
…Нядаўна яны былі яшчэ звычайнымі хлопцамі, а зараз — салдаты. У вайсковым жыцці іх адбыўся, бадай, самы ўрачысты момант — прысяга на вернасць Радзіме. Каб быць разам у такі хвалюючы момант, падтрымаць сыноў і братоў, з’ехаліся іх блізкія з розных куткоў Беларусі.
Больш за дзвесце чалавек Айчыны былі накіраваны ў 231 артылерыйскую брыгаду, 427 рэактыўны артылерыйскі полк, 52 асобны спецыяльны пошукавы батальён, 3609 артылерыйскі склад боепрыпасаў.
Малады падцягнуты чалавек упэўнена трымаў аўтамат. Было бачна, што для яго гэта не ў навінку.
— Аляксандр Хмялькоў, родам з Магілёва, — прадставіўся ён. — Пасля ваеннай кафедры ВНУ служыць буду толькі паўгода. Кожны малады чалавек павінен умець валодаць зброяй. Гэты час праляціць вельмі хутка, тым больш чакаць будуць бацькі і любая дзяўчына. Дарэчы, размаўляем з вамі каля майго РСЗА “Ураган”, на якім буду служыць.
Ірына Бурэніна прыехала з Віцебска да свайго сына Валерыя.
— Хвалююся, — прызналася яна. — Жадаю ўсім салдатам лёгкай службы. Каб яны паважалі адзін аднаго, слухаліся сваіх камандзіраў. Пасля няхай успамінаюць гэты час толькі добрым словам. Мы ўпэўнены ў тым, што нашы дзеці будуць здольнымі і мужнымі воінамі. А мы будзем іх чакаць.
…Бацькі, сваякі, сябры хутка пабеглі да салдатаў. Час для самага ўрачыстага моманту дня — прыняцця воінскай прысягі.
“Я, грамадзянін Рэспублікі Беларусь…” — будучыя воіны задуменна гаварылі свяшчэнныя словы клятвы. Маці ўпотай хусцінкамі выціралі сціплую слязінку, дзяўчаты сцішана ўздыхалі. Мільгалі ўспышкі фотаапаратаў.
Пасля прыняцця прысягі салдатаў асвяціў настаяцель храма свяшчэннамучаніка Уладзіміра протаіерэй Аляксей.
— Вам выпаў вялікі гонар служыць на святой лепельскай зямлі, якая ў гады Вялікай Айчыннай вайны не скарылася чужынцам. Будзьце дастойнымі прадаўжальнікамі справы сваіх старэйшых пакаленняў, — зазначыў старшыня раённага Савета дэпутатаў Мікалай Місюра.
Вэтэран брыгады палкоўнік у адстаўцы Дзмітрый Буцін выказаў упэўненасць, што новыя воіны будуць самааддана абараняць Айчыну.
Пасля прыняцця прысягі салдатам была дадзена магчымасць да вечара пабыць са сваімі блізкімі.
На здымках: прыняцце прысягі; урачысты марш.
Яўген Мікалаеў.