Сярэбраны прызёр Еўропы
Яўген Міхно скончыў дзясяты клас сярэдняй школы №3 і праславіў Лепельшчыну не толькі на ўзроўні рэспублікі, а і Еўропы. У складзе нацыянальнай зборнай каманды Беларусі хлопец выдатна выступіў на чэмпіянаце Еўропы па самба сярод юніёраў, які праходзіў у г. Лімасол на востраве Кіпр.
Яўген упэўнена выйграў усе папярэднія схваткі, выйшаў у фінал і стаў сярэбраным прызёрам Еўропы, атрымаў званне майстра спорту па самба.
Другое месца на чэмпіянаце Еўропы — значная падзея ў жыцці кожнага спартсмена. Сваімі ўражаннямі аб чэмпіянаце і нялёгкім шляху да перамогі падзяліўся ў сваім інтэрв’ю.
— Яўген, вядома, што да ўдзелу ў чэмпіянаце Еўропы ты ўжо выступаў на міжнародным узроўні?
— Так, раней я паспяхова выступіў на чэмпіянатах Еўропы ў Турцыі і Украіне.
— Колькі краін прыняло ўдзел у чэмпіянаце Еўропы, які праходзіў на востраве Кіпр?
— На чэмпіянат прыехалі спартсмены з Турцыі, Украіны, Грузіі, Арменіі, Азербайджана, Францыі, Італіі, Грэцыі, Польшчы, Румыніі, Славакіі і іншых краін.
Перад паездкай на чэмпіянат шмат часу аддаваў трэніроўкам, якія праходзілі ў Мінску. Гэта вельмі важны этап. Разам з намі займаліся вядомыя спартсмены нашай краіны. Асабліва запомніліся заняткі ў тытулаванага спартсмена Андрэя Курлыпы — неаднаразовага чэмпіёна свету, які ўжо даўно ўвайшоў у склад нацыянальнай зборнай рэспублікі. Падрыхтоўка праходзіла на працягу 15 дзён.
— Першы мой паядынак праходзіў са спартсменам з Украіны, атрымаў у ім перамогу. На падрыхтоўку да наступнага паядынка было дадзена пяць хвілін. Другая схватка адбылася з самбістам з Арменіі. І тут перамога стала маёй, выйграў з лікам 3:2.
Асаблівая напружанасць з’явілася перад пачаткам фінальнага паядынка з расійскім самбістам. Вельмі блізкай была перамога, але ў завяршэнні расійскі сапернік выканаў балявы прыём.
— Якія ўражанні ў цябе пакінуў Кіпр?
— Уразіў непаўторнай прыродай, незвычайнай расліннасцю, іншай атмасферай. Тэмпература паветра была больш за трыццаць градусаў. Захапіў сваёй прыгажосцю Парк Біч, дзе заўсёды адпачывае шмат гасцей. Гасцініца, дзе мы пражывалі, размяшчалася ў вельмі жывапісным месцы, за 50 метраў ад берага мора.
— Вядома, што для ўдзелу ў чэмпінаце Еўропы патрэбна нямалая сума фінансавых сродкаў. Хто пажадаў тваім выступіць спонсарам?
— Мы з трэнерам Галінай Паповай, безумоўна, вельмі ўдзячныя дырэктару ААТ “Лепельскі МКК” Аляксандру Міхайлоўскаму за тое, што прадпрыемства аказала значную спонсарскую падтрымку — трыццаць мільёнаў рублёў.
— Жэня, як пачынаўся твой спартыўны шлях? Ці памятаеш ты сваю першую перамогу?
— У секцыі дзюдо Лепельскай дзіцяча-юнацкай спартыўнай школы алімпійскага рэзерву “Волат” я пачаў займацца, калі мне было сем год. У маім выбары мяне падтрымалі бацькі. Тата, які звязаў жыццё са спортам, працуе настаўнікам фізкультуры ў сярэдняй школе №3, у свой час захапляўся тэхнікай дзюдо. Да маіх заняткаў заўсёды прыхільна ставілася і маці.
Памятаю і сваю першую перамогу. Гэта быў турнір на прызы старшыні райвыканкама Пятра Шыкшняна. Тут я заняў першае месца і атрымаў медаль.
Займацца дзюдо, самба хацелася б і ў будучым. Сёлета планую працягваць навучанне ў рэспубліканскім вучылішчы алімпійскага рэзерву.
Інтэрв’ю правяла
Святлана СІЛЬВАНОВІЧ.
На здымку: чэмпіён Еўропы па самба сярод юніёраў з заслужанымі ўзнагародамі.
Фота аўтара.