Первый экипаж-тысячник в районе и области
Уборачныя работы ў нашым раёне ў самым разгары, адзін за адным па моры спелых налітых каласоў ідуць камбайны. І хоць уборка збожжавых пачалася крыху больш як тыдзень таму, ужо дасягнуты значны рубеж — намалочана тысяча тон збожжа. У склад перадавога экіпажа-тысячніка не толькі ў раёне, а і Віцебскай вобласці ўвайшлі работнікі сельскагаспадарчага вытворчага філіяла “Заазер’е” ААТ “Віцебскі мясакамбінат” — старшы камбайнер Леанід Аляксеенка і камбайнер Павел Ханяк. Вядома, што гэта стала значнай падзеяй для ўсёй вобласці.
Для таго каб ад душы павіншаваць камбайнераў-тысячнікаў і ўручыць ім заслужаныя ўзнагароды, прама ў поле выехалі старшыня Віцебскага аблвыканкама Мікалай Шарснёў, генеральны дырэктар дзяржаўнага аб’яднання “Віцебскі канцэрн “Мяса-малочныя прадукты” Віктар Пазняк старшыня райвыканкама Барыс Яфрэмаў, першы намеснік старшыні — начальнік упраўлення сельскай гаспадаркі і харчавання райвыканкама Міхаіл Кісялевіч і іншыя ганаровыя госці.
Меладычныя гукі народных песень, снапы, упрыгожаныя чырвонымі стужкамі, дзясяткі аб’ектываў фотакамер — усё гэта стварала святочны настрой гасцям і самім віноўнікам урачыстасці.
— Вельмі прыемна, што першымі камбайнерамі-тысячнікамі ў раёне штогод становяцца менавіта работнікі СВФ “Заазер’е”, — адзначыў дырэктар філіяла Аляксандр Быкаў. — Удвая прыемна, што сёлета нашы камбайнеры сталі першымі не толькі ў раёне, а і вобласці. Леанід Аляксеенка — малады, але ўжо даволі вопытны камбайнер, працуе ў гаспадарцы з 2011 года. Павел Ханяк, які працуе ў экіпажы разам з ім, працуе ў на ўборцы першы год, але таксама добра ведае сваю справу. Дасягнуць высокага выніку ўдалося дзякуючы прафесіяналізму работнікаў, а таксама выдатнай тэхніцы — экіпаж працуе на сучасным камбайне “New Holland CR 9.80”. За адзін дзень камбайн праходзіць каля 67 гектараў і ўбірае прыблізна 283 тоны збожжа. Калі 29 ліпеня ў 19.00 было ўбрана 1006 тон, то ўжо раніцай 30 ліпеня было намалочана 1087 тон збожжа. Паспяховаму ходу ўборкі садзейнічае і выдатнае надвор’е. Дзякуючы ўсім гэтым фактарам, упэўнены, нам удасца дасягнуць яшчэ больш высокіх вынікаў.
Каб прыняць шчырыя віншаванні, камбайнерам прыйшлося на некаторы час спыніць сваю работу.
— Вядома, што ў філіяле “Заазер’е” вы працуеце ўжо не першы год. Калі ж пачалі работу на ўборцы збожжавых? — пытаюся ў Леаніда.
— На ўборцы працую трэці сезон.
— Калі ж пачынаецца ваш працоўны дзень?
— Прыступаем да працы з самай раніцы. Усё залежыць ад умоў надвор’я. Звычайна рабочы дзень пачынаецца ў 6.30. Працуем да самага змяркання, заканчваем працу а першай гадзіне ночы.
— Праца на камбайне — не з лёгкіх…
— Так. Аднак нам пашанцавала працаваць на сучаснай тэхніцы, якая мае высокую магутнасць. У параўнанні з іншымі камбайнамі на “New Holland” удаецца ўбраць даволі вялікі ўчастак. Да таго ж кабіна аснашчана кандыцыянерам. У салоне захоўваецца аптымальная тэмпература, таму працаваць заўсёды камфортна.
— Вы родам з Лепельшчыны?
— Я нарадзіўся ў пасёлку Акцябрскі Віцебскага раёна. Пасля школы скончыў Віцебскі дзяржаўны політэхнічны прафесійны ліцэй №3 г.Віцебска. Прыехаў на Лепельшчыну, калі стварыў сваю сям’ю. Тут нарадзілася мая жонка. Мы жывём ва ўласным доме ў Лепелі. Старэйшаму сыну Дзянісу ўжо споўнілася сем год, а дачушцы Дарыне — чатыры.
— Штодзённая руплівая праца аплачваецца дастойна?
— У перыяд уборкі атрымліваю 1, 5 тысячы рублёў.
— Я працую ў складзе экіпажа першы сезон, але да гэтай работы ўжо прывык. Працаваць прыходзіцца шмат, аднак за работай час пралятае непрыкметна, — далучыўся да размовы камбайнер Павел Ханяк.
— Як жа пачынаўся ваш шлях да прафесіі?
— Пасля школы скончыў курсы трактарыстаў пры Лепельскім дзяржаўным прафесійным ліцэі. Спачатку працаваў трактарыстам-машыністам у філіяле “Заазер’е” ААТ “Віцебскі мясакамбінат”, а потым мне прапанавалі працу на камбайне. Пагадзіўся і вельмі задаволены — работа не з лёгкіх, але ёсць магчымасць атрымаць добры заробак.
Як аказалася, Павел — не толькі перадавік гаспадаркі, а і шматдзетны тата. Сям’я Ханяк жыве ў аграгарадку Камень. Жонка Вольга да адыходу ў дэкрэтны водпуск працавала ў гандлёвай сферы, а зараз даглядае малодшую дачушку Анечку, якой споўніўся адзін год. Старэйшаму сыну Мікіце — адзінаццаць, а сярэдняму, Максіму, — сем.
І вось да поля набліжаюцца аўтамабілі ганаровых гасцей. Да ўдзельнікаў экіпажа падыходзяць прадстаўнікі Віцебскага аблвыканкама і райвыканкама.
— Сёлета нам удаецца дасягнуць высокіх вынікаў ва ўборцы збожжавых — дванаццаць працэнтаў палёў Віцебскай вобласці ўжо ўбрана, — адзначыў старшыня Віцебскага аблвыканкама Мікалай Шарснёў. — Каб уборка праходзіла зладжана і хутка, у нас ёсць усё: мэтанакіраванасць работнікаў, высакаякасная тэхніка і добрыя ўмовы надвор’я. Мы не павінны ўпусціць ніводнай пагодлівай хвіліны, прыкласці шмат намаганняў, каб атрымаць наша галоўнае багацце — духмяны хлеб. Людзі ж, працай якой мы атрымліваем яго, заслугоўваюць самых цёплых слоў і найлепшых узнагарод.
Мікалай Шарснёў павіншаваў камбайнераў-тысячнікаў і ўручыў ім заслужаныя ўзнагароды. Цёплыя словы ў адрас перадавых хлебаробаў выказаў таксама старшыня райвыканкама Барыс Яфрэмаў, уручыў ім Дыпломы райвыканкама, грашовыя прэміі і каштоўныя паадрункі. Павіншаваў работнікаў з гэтай значнай падзеяй і генеральны дырэктар дзяржаўнага аб’яднання “Віцебскі канцэрн “Мяса-малочныя прадукты” Віктар Пазняк, уручыў ім каштоўныя падарункі. Цёплыя словы ў адрас хлебаробаў выказаў таксама старшыня Лепельскай раённай арганізацыі Беларускага прафсаюза работнікаў аграпрамысловага комплексу Сяргей Марціновіч. Ён уручыў прадстаўнікам экіпажа Ганаровыя граматы арганізацыі, сцяжкі, памятныя вымпелы і грашовыя прэміі. Старшыня прафсаюзнай арганізацыі СВФ “Заазер’е” ААТ “Віцебскі мясакамбінат” Вячаслаў Ляйко ўзнагародзіў камбайнераў грашовымі прэміямі.
Выдатным дапаўненнем цёплых віншаванняў сталі спевы ўдзельнікаў вакальнай групы “Вяселіца” Поўсвіжскага сельскага Дома культуры пад кіраўніцтвам Аляксандра Міхно.
— Такія выдатныя работнікі — гэта гонар не толькі Лепельшчыны, а і ўсёй краіны. Толькі разам, аб’яднаўшы свае намаганні, працавітасць і няспынную энергію, мы зможам дасягнуць значных вынікаў на ўборцы збожжавых. Вялікі дзякуй вам за вашу руплівую працу, — ад усёй душы пажадаў удзельнікам экіпажа старшыня аблвыканкама.
Леанід Аляксеенка і Павел Ханяк сядаюць у камбайн і прыступаюць да жніва — наперадзе ў іх яшчэ шмат работы.
Да моманту падрыхтоўкі матэрыялу мы даведаліся, што раніцай другога жніўня моладзевы экіпаж у складзе Леаніда Аляксеенкі і Паўла Ханяка ўжо намалаціў больш за паўтары тысячы тон збожжа.
[metaslider id=14350]
Святлана ВАЗНЯК.
Фота аўтара.
Первый и лучший в своем деле, значит отдавался своей работе полностью, а значит и заслужил награду
Рейтинг комментария:00