Танкавы бой
Яшчэ адзін наш герой-зямляк Мікалай Мікалаевіч Тамашэвіч, партрэт якога намаляваў малады лепельскі мастак Аляксей Ляшчоў, нарадзіўся 13 мая 1921 года ў вёсцы Новыя Валосавічы Лепельскага раёна ў сям’і селяніна. Закончыў мясцовую школу-сямігодку і два курсы рачнога тэхнікума ў горадзе Мазыр Гомельскай вобласці. Працаваў механікам на гідравузле.
У Чырвонай арміі з 1940 года. Служыў у 46-й танкавай дывізіі 21-га механізаванага корпуса Прыбалтыйскай ваеннай акругі.
З чэрвеня 1941 года на фронце. Быў камандзірам танка, узвода, роты. Ваяваў на Паўночна-Заходнім фронце, на Волхаўскім, Ленінградскім і Карэльскім франтах. У 1943 годзе закончыў курсы малодшых лейтэнантаў. У баях двойчы быў паранены.
У 1941 годзе ўдзельнічаў у баявых дзеяннях у раёне гарадоў Даўгаўпілс, Рэзекне, Апочка, рэк Ловаць і Свір, у вызваленні горада Ціхвін, а ў 1942 годзе — у Любанскай аперацыі, у змаганні з ворагам у раёне Спаскай Палісці і Мяснога Бора.
У 1943 годзе прарываў блакаду Ленінграда ў раёне станцыі Сінявіна.
У студзені 1944 года пачалася Ленінградска-Наўгародская наступальная аперацыя нашых войскаў, мэтай якой быў прарыў блакады Ленінграда. У ходзе наступлення першаму батальёну 7-й асобнай гвардзейскай танкавай брыгады было загадана авалодаць вёскай Кшэнціцы Ленінградскай вобласці. Тут гітлераўцы стварылі моцны апорны пункт. Па папярэдніх даных разведкі, у вёсцы знаходзілася каля 25 супрацьтанкавых гармат, некалькі мінамётных батарэй. Але дзе яны знаходзіліся, было невядома. Выявіць іх вырашылі разведкай боем. Гэтую складаную задачу даручылі Мікалаю Мікалаевічу Тамашэвічу — камандзіру танка 7-й асобнай гвардзейскай танкавай брыгады 8-й арміі Ленінградскага фронту.
Праз некалькі хвілін танк Мікалая Тамашэвіча рашуча накіраваўся наперад, за імі астатнія баявыя машыны падраздзялення. На адной з палянак сярод лесу ўсе танкі спыніліся, і далей пайшла толькі баявая машына пад камандаваннем Мікалая Мікалаевіча.
Калі танк панёсся непасрэдна да вёскі, Мікалай Тамашэвіч замяніў наводчыка гарматы. І не таму, што не давяраў яму, а проста сам лічыўся ў батальёне сапраўдным “танкавым снайперам”, бо лепш за ўсіх трапляў у цэль.
Баявая машына ўварвалася ў Кшэнціцы. У гэты час фашысты абедалі. Убачыўшы палявую кухню і салдат каля яе, на поўным хаду наехалі на іх. Некалькі гітлераўцаў кінуліся да гарматы, але Мікалай Мікалаевіч двума снарадамі знішчыў гармату з разлікам.
Танкісты працягвалі рэйд па варожых пазіцыях. Праскочылі ў канец вёскі, развярнуліся, падмяўшы пад сябе адну супрацьтанкавую гармату, потым — другую. Камандзір танка ў гэты час вёў агонь па іншых цэлях.
Скіраваўшы ўсю сваю ўвагу на адну баявую браніраваную машыну, якая бясстрашна атакавала іх, фашысты не заўважылі, як да вёскі наблізілася танкавая рота гвардзейцаў. Яна без бою захапіла варожую батарэю, потым — другую. Знішчыла гарматы.
Хоць праціўнік і панёс вялікія страты, аднак сілы ў яго яшчэ хапала. Нашы танкісты таксама панеслі страты. Пад вечар была падбіта і баявая машына Мікалая Тамашэвіча. Загінуў механік-вадзіцель. Мікалай Мікалаевіч сам сеў за рычагі. У гэты момант снарад разбіў правую гусеніцу. Агнём ад выбуху апякло твар. Мікалай Тамашэвіч падняўся ў вежу, агледзеў мясцовасць. Заўважыў хлеў, у сцяне якога было выстаўлена бервяно, і ўспышку ад выстралу. Зразумеў, што там схавана гармата. Дакладнымі выстраламі Мікалай Мікалаевіч знішчыў агнявую кропку ворага.
Толькі калі скончыўся боезапас, танкісты пакінулі баявую машыну. Мікалай Тамашэвіч умела арганізаваў кругавую абарону і вёў бой да падходу падраздзяленняў батальёна.
Указам Прэзідыума Вярхоўнага Савета СССР ад 26 жніўня 1944 года за ўзорнае выкананне баявых заданняў камандавання на фронце барацьбы супраць нямецка-фашысцкіх захопнікаў і праяўленыя пры гэтым мужнасць і гераізм гвардыі малодшаму лейтэнанту Тамашэвічу Мікалаю Мікалаевічу было прысвоена званне Героя Савецкага Саюза з уручэннем ордэна Леніна і медаля “Залатая Зорка”.
Пасля вызвалення Карэліі 7-я асобная гвардзейская танкавая брыгада была перакінута ў Запаляр’е і перададзена 14-й арміі Карэльскага фронту. У яго складзе Мікалай Тамашэвіч адважна змагаўся ў Петсама-Кіркінескай наступальнай аперацыі ў кастрычніку 1944 года. На берагах Баранцава мора ў снежні 1944 года Мікалай Мікалаевіч завяршыў свой баявы шлях, быў накіраваны на вучобу ў Ленінградскую вышэйшую афіцэрскую бронетанкавую школу. Затым служыў камандзірам танкавага батальёна ў Ленінградскай ваеннай акрузе.
Узнагароджаны ордэнамі Леніна, Айчыннай вайны 1-й і 2-й ступеняў, медалямі “За адвагу”, За абарону Савецкага Запаляр’я” і іншымі.
З 1956 года капітан Мікалай Тамашэвіч — у запасе. Жыў у горадзе Ленінградзе. Працаваў транспартным дыспетчарам у аўтакалоне. Памёр 23 верасня 1983 года. Пахаваны ў Санкт-Пецярбурзе на Нова-Волкаўскіх могілках.
Горад на Няве захоўвае добрую памяць аб храбрым лепяльчаніне. Яго імя высечана на мармуравай дошцы, якая знаходзіцца ў Памятнай зале велічнага манумента, створанага ў гонар гераічных абаронцаў Ленінграда.
Мікалай
ГАРБАЧОЎ.
На здымку: партрэт Героя Савецкага Саюза Мікалая Мікалаевіча Тамашэвіча, які намаляваў мастак Аляксей Ляшчоў (творчы псеўданім Manchado).
Фота аўтара.