Творческая лаборатория для библиотекарей на Лепельщине
У Горскай сельскай бібліятэцы для сельскіх бібліятэкараў праведзены заняткі ў творчай лабараторыі. Бібліятэкар Алена Пятроўна Гурко пазнаёміла калег з дзейнасцю сваёй бібліятэкі, а потым запрасіла ўсіх на восеньскія пасядзелкі.
— Беларускія вячоркі… З глыбокай даўніны прыйшоў да нас гэты народны звычай. Заўсёды беларускі народ славіўся сваёй працавітасцю, весялосцю, сяброўствам. Пасля працы доўгімі зімовымі вечарамі людзі збіраліся ў сялянскай хаце на вячоркі, дзе яны не толькі займаліся любімымі справамі, але і весяліліся ад усёй душы. Як бы цяжка ні было ў тыя далёкія часы, заставалася любоў да народа, да песень, танцаў, гульняў, жартаў. Вось таму мы сёння і запрасілі вас на нашы вячоркі, каб павучыцца ў нашых продкаў працаваць, весяліцца, танцаваць, у гульні розныя гуляць, — з такіх слоў пачалося свята.
Сустракалі гасцей гаспадары сялянскай хаткі, у якую часова была ператворана бібліятэка. У афармленні інтэр’ера хаткі былі выкарыстаны розныя прадметы сялянскага быту, вышытыя сваімі рукамі ручнікі, посцілкі, даматканыя палавікі. У кожнай вясковай хаце раней стаяла скрыня, у якой захоўвалася рознае адзенне. У нашых гаспадароў таксама аказалася скрыня, але незвычайная, з сюрпрызам: знайшліся тут і беларускія загадкі, і прыказкі, і нават старажытная легенда аб родным Горскім краі. Госці адгадвалі загадкі, танцавалі беларускую польку, гулялі ў розныя гульні. У выкананні Ірыны Бусавай і Віталя Конева гучалі беларускія песні. Свята таксама ўпрыгожылі вясёлы дамавёнак Кузя, які жыве ў бібліятэцы; выстава таленавітых майстрых “Рукі майстрых твораць цуды” і сапраўдных гаспадынь вёскі Горкі “Восеньскія фантазіі”.
Усё гэта зрабіла мерапрыемства змястоўным, цікавым, прыгожым, і прайшло яно на адным дыханні, у цёплай і сяброўскай абстаноўцы. Калегі засталіся вельмі ўдзячнымі арганізатарам свята.
