У Аношках няма доступу ў інтэрнэт, да лічбавага тэлебачання…

У Аношках няма доступу ў інтэрнэт, да лічбавага тэлебачання і надзейнай сотавай сувязі, хаця ў канцы 2014 года Велеўшчыну забяспечылі новай мультымедыйнай сувяззю, якая дазваляе карыстацца высакахуткасным інтэрнэтам і інтэрактыўным лічбавым тэлебачаннем “Zala”. А чаго было б адразу не падоўжыць такую лінію сувязі яшчэ на некалькі кіламетраў, зрабіць яе, напрыклад, да той жа вёскі Аношкі, дзе знаходзіцца “мёртвая зона” па прыёме сотавай тэлефоннай сувязі, не кажучы ўжо пра магчымасці карыстання ў гэтым населеным пункце інтэрнэтам? Замест гэтага сувязісты паступілі яшчэ горш: без атрымання згоды ад мясцовых абанентаў ліквідавалі правадную тэлефонную сувязь. Гэта тым больш здзіўляе, што Аношкі — вельмі перспектыўная вёска, размешчаная на ўзбярэжжы прыгожага ляснога возера Оч, дзе пабудавана больш за дзесяць дыхтоўных добраўпарадкаваных лецішчаў, адсутнічаюць безгаспадарчыя дамы, паколькі яны ўвесь час выкарыстоўваюцца мясцовымі насельнікамі або дачнікамі з Мінска, Барысава, Лепеля, іншых гарадоў нашай краіны. Людзі даўно ўжо чакаюць, але ніяк не дачакаюцца з’яўлення ў Аношках хаця б нейкіх надзейных сродкаў сувязі са знешнім светам.
Тамара ЯШЧАНКА,
жыхарка вёскі Аношкі.