У Лепель да малышоў прыляцеў Карлсан…
С канцэртнай праграмай “У гасцях у Мішкі” ў госці да выхаванцаў з сацыяльна – педагагічнага цэнтра завітала валанцёрская група “Доктар Небаліт” з Віцебска.
З вясёлым гоманам да дзяцей заляцелі клоўн Карандаш і Карлсан, які жыве на даху. З дапамогай каляровых алоўкаў і гуашы ператварыліся ў казачных герояў: ката ў ботах, шэрага зайку, тыгра з джунгляў. Потым дзеці вырашылі адправіцца ў далёкае падарожжа ў невядомыя краіны на вялікім караблі. Аднак даплыць – справа нялёгкая. Раздзьмулі ветразі, кінулі якар у чароўным каралеўстве. Усе з бляскам справіліся з заданнем. За добра выкананую працу – пасвячэнне ў рыцары круглага стала.
Акрамя салодкіх падарункаў у краіне цудаў сустрэлі і Мядзведзя, які прапанаваў паскакаць праз скакалку. Трэба было бачыць, якім святлом ззяла ўсмешка на вуснах кожнага дзіцяці.
Напрыканцы Карандаш (Юля Аляшкоўская), распавяла пра сваю каманду:
— У нашым валанцёрскім аб’яднанні – каля пятнаццаці чалавек. Займаемся “клоўнатэрапіяй” – наведваем бальніцы, сацыяльна-педагагічныя цэнтры. Былі ў вас год таму, вырашылі завітаць яшчэ раз.
Не хацелі дзеці адпускаць казачных герояў, з якімі паспелі як след пасябраваць. Аднак, на жаль, прыйшоў час развітвацца да наступнай сустрэчы – валанцёраў чакалі ў Бешанковічах.