У лепельскай «Жамчужыне» арганізуецца здабыча якаснай мінеральнай вады
Прама скажам, нялёгка зараз не толькі вытворцам, а і наогул усяму рэальнаму сектару эканомікі Лепельшчыны. Традыцыйныя рынкі збыту гатовай прадукцыі патрабуюць дыверсіфікацыі, фінансавыя праблемы Расіі, падзенне курсу рубля, іншыя праблемы рознага кшталту наклалі свой негатыўны адбітак на вытворчы працэс. Аднак дарогу адужае толькі той, хто настойліва рухаецца наперад. А рух той без мадэрнізацыі тэхнічных магутнасцей немагчымы. Гэтую ісціну выдатна ўсвядомілі ў адкрытым акцыянерным таварыстве “Лепельскі малочнакансервавы камбінат”. У пералік ключавых інвестыцыйных праектаў уключана будаўніцтва цэха па вытворчасці сухога малака з рэканструкцыяй дапаможных вытворчасцей. Фінансаванне праекта вызначана пастановай Савета Міністраў Рэспублікі Беларусь. Гэта бліжэйшая перспектыва. Тым часам завершана мадэрнізацыя сушыльнай вытворчасці, тэхнічна перааснашчана малочнатаварная ферма СВФ “Заазер’е” ў вёсцы Поплаўкі, мадэрнізаваны будынкі маслацэха, кампрэсарнай, у працэсе рэканструкцыя будынка колішняй кацельні пад склад гатовай прадукцыі.
Арыентуюцца на новыя прагрэсіўныя тэхналогіі і на філіяле “Лепельскі хлебазавод” РУП “Віцебскхлебпрам”. Зманціравана флексаграфічнае абсталяванне, набыты дзве энергазберагальныя печы, два новыя агрэгаты для нарэзкі хлебабулачных вырабаў, халадзільная шафа ў склад сутачнага запасу сыравіны і іншае неабходнае абсталяванне.
У КУП ДРАЦ “Жамчужына” ў стадыі рэалізацыі перспектыўны інвестыцыйны праект па здабычы мінеральных вод з падводам да лячэбнага корпуса. Асвоена чатыры мільярды рублёў. Завершана практычна бурэнне свідравін, узведзены будынак бювета. Добраўпарадкоўваецца прылеглая тэрыторыя. Выканана таксама праектна-каштарысная дакументацыя па будаўніцтве спальнага корпуса.
З адзінаццаці інвестыцыйных праектаў у раёне рэалізавана два, шэсць — у стадыі выканання, па трох пакуль тэрміны рэалізацыі не праглядваюцца. Пры прагнозным аб’ёме фінансавання 157,6 мільярда рублёў асвоена 101,1 мільярда.
Без абнаўлення і ўдасканалення вытворчых магутнасцей нельга гаварыць аб перспектывах дынамічнага развіцця народнагаспадарчага комплексу рэгіёна. І на гэтым магістральным шляху сканцэнтраваны сілы і сродкі мясцовай улады, прадпрыемстваў і арганізацый.
У. ВАЛОДЗІН.