У Лепельскім пансіянаце “ЛАДЭ” абуладкавалі дзіцячую пляцоўку і прывезлі маламута
Летам на паўвостраве “Ладэ” была абуладкавана новая дзіцячая пляцоўка. Для адпачынку юных наведвальнікаў створаны горкі, арэлі і іншыя прыстасаванні. Ёсць дзе паскакаць і пабегаць непаседам.
У пансіянат шматпрофільнага медыцынскага цэнтра “Ладэ” прывезлі шчанюка сабакі пароды маламут. Гэта адна з самых старажытных парод, з’яўляецца сімвалам штата Аляска і лічыцца адной з першых, прыбліжаных да чалавека. Адна з асаблівасцей сабакі — яна не брэша, толькі бурчыць. Гэта характэрна толькі для дзвюх сабак: маламута і басенджы. Нягледзячы на ўнушальныя памеры, сабака адрозніваецца дабрадушным характарам.
Апрацоўка бітумнай эмульсіяй і шчэбнем
У студзені — жніўні толькі ў межах раёна была зроблена паверхневая апрацоўка з выкарыстаннем бітумнай эмульсіі і шчэбню трох участкаў аўтамагістралі Мінск — Віцебск: даўжынёй чатыры кіламетры — ад моста цераз раку Бярэзіна і амаль да вёскі Рожна, тры кіламетры — ад вёскі Рудня і да аўтастаянкі “Гасціны двор” і 2,5 кіламетра — ад вёскі Бароўка-2 і да паварота на аграгарадок Камень. Акрамя таго, была выканана такая работа на дарозе рэспубліканскага значэння Лепель — Ушачы праз Юркоўшчыну на адрэзку 12,6 кіламетра ад Ворані і да Лясных Азёраў.
Ацынкаваная агароджа
Заменена, устаноўлена новая металічная бар’ерная агароджа з ацынкоўкай светлай афарбоўкі і з выкарыстаннем элементаў сучаснага дызайну на шашы Мінск — Віцебск у межах раёна агульнай даўжынёй больш за 2,5 кіламетра.
Аўтапавільёны для пасажыраў
На дарозе Мінск — Віцебск каля асфальтаванай аўтастаянкі ў Бароўцы з аднаго боку праезнай часткі пабудаваны аўтапавільён, а з другога — пасадачная пляцоўка. На гэтай жа аўтамагістралі на ўскраіне Лепеля насупраць ДБУ №34 замест пасадачнай пляцоўкі ўзводзіцца аўтапавільён.
Наш кар.