Як накорміш, так і надоіш
Старая народная мудрасць сцвярджае, што малако ў каровы на языку. Гэта азначае, што колькасць і якасць малака залежыць ад колькасці і якасці кармоў. Спрадвеку кароў кармілі сенам, саломай, у сярэдзіне мінулага стагоддзя кармавая база ўзбагацілася такімі відамі кармоў, як сянаж і сілас.
Пагалоўе буйной рагатай жывёлы ў раёне налічвае каля трынаццаці з паловай тысяч умоўных галоў. Няцяжка спрагназаваць, колькі кармоў спатрэбіцца, каб надзейна забяспечыць утрыманне ў час стойлавага перыяду. Дарэчы, у некаторых гаспадарках жывёлу вывелі з пашаў у стойлы ўжо больш за месяц таму. Палеткі адпачываюць. Затое шмат працы на фермах: накарміць дойных кароў, маладняк, дагледзець усіх.
Самае вялікае пагалоўе, больш за тры з паловай тысячы, утрымліваецца ў СВФ “Заазер’е”. У іх жа неблагая і забяспечанасць кармамі, 21 — 22 цэнтнеры кармавых адзінак на ўмоўную галаву. Аднак самы лепшы гэты паказчык у КУВСГП “Лепельскае” — 26,2. Аснову кармавой базы складае сянаж, больш за дзесяць тысяч тон. Яшчэ сем тысяч тон сіласу.
Другі радок па забяспечанасці кармамі ўтрымлівае СВП “Пражэктар”, дзе на сярэдзіну восені маюць па 25,8 цэнтнера кармавых адзінак на ўмоўную галаву. Аснову кармавога рацыёну складае сілас, якога ў наяўнасці не менш за 12 тысяч тон, з іх травянога сіласу — пяць тысяч тон, сіласу кукурузнага — сем тысяч тон. Рацыён арганічна дапаўняецца сенажом, сенам, камбікармамі.
Гаворачы пра якасць кармоў, важна ўлічваць, што на прадукцыйнасць жывёлы ўплывае не толькі наяўнасць таго ці іншага корму, а яшчэ і іх арганічнае спалучэнне. Так, для павелічэння і паляпшэння малака варта дадаваць больш сіласу. А вось для прыросту і развіцця маладняку лепшае значэнне мае сена. Дарэчы, сена сёлета найбольш нарыхтавана ў КУВСГП “Баброва”. Згодна з матэрыяламі раённай зводкі, на сярэдзіну восені ў гаспадарцы ў наяўнасці было не менш за 600 тон гэтых кармоў.
Сёлета кармавыя адзінкі даваліся вяскоўцам вельмі цяжка. У чэрвені, калі надышла пара сушыць сена, залілі дажджы, таму менавіта сена было нарыхтавана адносна няшмат. Большасць травяной масы была скіравана ў сянажныя і сіласныя траншэі. І тут найбольш выйграў той, хто бездакорна выконваў тэхналагічныя патрабаванні.
Нельга пры гэтым абмінуць і тыя гаспадаркі, якія па розных прычынах займаюць невысокія месцы. Гэта, найперш, ААТ “Лепельскі райаграсэрвіс”, дзе, згодна з раённай зводкай, на сярэдзіну восені ў наяўнасці было па 10,7 цэнтнера кармавых адзінак на ўмоўную галаву. Крыху лепшая сітуацыя назіраецца ў ААТ “Ладасна”, дзе на кожную ўмоўную галаву мелася па 14,2 цэнтнера кармавых адзінак. Магчыма, зноў гаспадаркам, якія адстаюць, давядзецца прыходзіць на выручку. Тыя, хто летам пастараўся, нарыхтаваў кармоў з запасам, працягнуць суседзям руку дапамогі.
Васіль МАТЫРКА.