Звонкая Масленіца вясну прынесла на Лепельшчыну!
— Масленіца залатая,
Блінная і завадная!
У свой чароўны карагод
Закруці ўвесь наш народ!
Светлай вам вясны жадаем,
Быць шчаслівымі жадаем! — гучаць са сцэны пранікнёныя радкі, шчыра весяліцца народ, паўсюдна не сціхаюць звонкія спевы і танцы. Вось так, ярка і запамінальна, кожны год у нашым раёне адзначаецца Масленіца ў Бароўцы.
Гісторыя гэтага свята пачынаецца яшчэ з дахрысціянскіх часоў. Са старажытнасці Масленіца азначае праводзіны зімы, якія святкаваліся на працягу чатырнаццаці дзён. Першы тыдзень папярэднічаў дню вясновага раўнадзенства, другі праходзіў ужо пасля яго. У гэты час халады пачалі ўжо адступаць, а прырода — абуджацца. Зразумела, што людзі з радасцю сустракалі надыход цяпла, паколькі ўсё жывое пачынала настройвацца на новыя рытмы жыцця.
Народныя гулянні праходзілі з асаблівым размахам. Людзі ад душы весяліліся, частаваліся блінамі, іншымі апетытнымі стравамі. Пазней гулянні на Масленіцу скараціліся з двух тыдняў да аднаго і былі звязаны з тыднем, які папярэднічаў Вялікаму посту.
У апошні дзень тыдня заканчваліся ўсе гулянні, і людзі аб’ядаліся блінамі. У гэты дзень было прынята не толькі заканчваць усе гулянні, але таксама прасіць прабачэння.
Традыцыі, якія прайшлі праз стагоддзі, жывуць і ў нашы дні. Шмат гасцей з нагоды свята ў Бароўцы сабралася і сёлета.
З самай раніцы на пляцоўцы перад уваходам у Бароўскі цэнтр культуры і вольнага часу гучалі звонкія акорды песень, узнімалі настрой гасцям вясёлыя казачныя персанажы: вясёлы Мішка, гарэзлівы Дракоша, сімпатычны Зайчык і непаседа Малпачка.
Непадалёк ад пляцоўкі быў накрыты святочны стол, на якім гасцям прапаноўваліся свежаспечаныя бліны з тварагом, мёдам, цукровай пудрай і іншыя апетытныя стравы. Немагчыма было адвесці вачэй ад цудоўных вырабаў з бісеру, самаробак, змайстраваных умелымі рукамі выхаванцаў гурткоў Бароўскага філіяла раённага цэнтра дзяцей і моладзі, наведвальнікаў дзённага знаходжання для састарэлых тэрытарыяльнага цэнтра сацыяльнага абслугоўвання насельніцтва, а таксама Віцебскага Дома рамёстваў.
Вельмі ўжо пастараліся работнікі ўстаноў, вучні Бароўскай сярэдняй школы, каб свята ўдалося на славу. КУП ДРАЦ “Жамчужына” была наладжана гульня ў дартс, артысты Бароўскага цэнтра культуры і вольнага часу арганізавалі спаборніцтвы па перацягванні каната і падняцці гіры.
Вершаванымі радкамі прывіталі гасцей Алена Несцерава, Наталля Занько і Алена Матузава. Святочны настрой гасцям падарылі спевы ў выкананні вакальнай групы “Аколіца”. Узнялі настрой гасцям бадзёрыя частушкі ў выкананні Ніны Хрычэнка, спевы Мікалая Мадатава, Віктара Папко. Парадавалі гасцей яркімі выступленнямі таксама юныя артысты Ліза Ахмеціна, Дана Зінурава, Саша Варчак, Дзіна Ражкова і іншыя артысты. Гледачы не маглі стрымаць станоўчых эмоцый у час выступлення юных артыстаў Бароўскай сярэдняй школы, якія падрыхтавалі флэшмоб “У полі каліна…” Пад рытмічныя акорды народнай песні шчыра весяліліся дарослыя і дзеці.
Па традыцыі ў апошні дзень гулянняў з саломы і анучы вырабляецца пудзіла, якое выносіцца праз усю вёску на поле. Такое ж пудзіла было падрыхтавана і ў гэты святочны дзень. Пудзіла было спалена, а гэта сімвалізуе развітанне з зімой і пачатак вясны, якая нясе з сабой абуджэнне, асаблівую радасць і прыгажосць.
Святлана
СІЛЬВАНОВІЧ.
На здымках: яркія моманты Масленіцы ў Бароўцы.
Фота аўтара.