Сагрэць адзінокія сэрцы лепяльчан
Жыццё непрадказальнае. Ніхто не ведае, дзе давядзецца дажываць апошнія гады. Магчыма, што і ў доме для састарэлых. А як выглядае гэты дом, у якіх умовах жывуць тут людзі? Гутарым з дырэктарам тэрытарыяльнага цэнтра сацыяльнага абслугоўвання насельніцтва Наталляй Івановай.
— Такой назвы, як дом састарэлых, не існуе. Ёсць аддзяленне для кругласутачнага знаходжання пажылых людзей «Святліца» ў Камені. Працуе яно са снежня 2005 года і разлічана на шэсцьдзясят чалавек.
— Колькі людзей там знаходзіцца зараз і што гэта за людзі?
— Сорак два чалавекі, пераважная большасць —жанчыны (31). Сярод пастаяльцаў трыццаць сем адзінокіх людзей, сем інвалідаў, адзін вязень фашысцкіх засценкаў.
— Адзінокія карыстаюцца льготнымі ўмовамі?
— Яны не плацяць за пражыванне, аднак восемдзесят пяць працэнтаў пенсіі ў час знаходжання ідзе ў даход дзяржавы. Тыя ж, у каго ёсць дзеці, плацяць за пражыванне цалкам.
— Хто і як абслугоўвае пажылых людзей?
— Тут працуюць дваццаць адзін чалавек абслуговага персаналу: медсёстры, загадчык гаспадаркі, сацыяльныя і кухонныя работнікі і г.д. Узначальвае аддзяленне Алена Чувіліна.
— У якіх умовах жывуць састарэлыя людзі?
— Хоць аддзяленне было створана параўнаўча нядаўна і плошчы не зношаныя, аднак увесь час штосьці рамантуем, удасканальваем, мадэрнізуем, як кажуць, не запускаем будынак. Штогод праводзім касметычныя рамонты. Адрамантавалі бітумны дах. Акрамя таго, у снежні мінулага года ўдасканалілі цепласістэму. Агульны кошт праекта па цепласістэме склаў 221,4 мільёна рублёў. Сёлета была зманціравана геліяўстаноўка для награвання вады, якая выкарыстоўваецца ў харчблоку. Для гэтага ў падвале ўстанавілі спецыяльныя бакі, а на даху — абсталяванне, якое падагравае ваду за кошт сонечнай энергіі.
— Хто фінансаваў гэтыя праекты?
— Праект мадэрнізацыі цепласістэмы фінансаваў фонт «Экамір», з якога было выдзелена 201,6 мільёна рублёў, а таксама мясцовы бюджэт. Былі задзейнічаны і пазабюджэтныя сродкі, заробленыя ў выніку комплекснага надомнага абслугоўвання і разавых паслуг, што аказвала аддзяленне тэрміновай дапамогі. Геліяўстаноўка была зманціравана ў межах праграмы энергаэфектыўнасці. Усяго гэты праект каштаваў 258,6 мільёна рублёў. З іх 114,6 мільёна выдаткаваў фонд «Экамір». Сто дзесяць мільёнаў было затрачана з рэспубліканскага бюджэту і трыццаць чатыры — з мясцовага.
— Чыё гэта абсталяванне і хто яго манціраваў?
— Абсталяванне айчыннай вытворчасці. Было пастаўлена «Экамірам» з Гомеля і зманціравана работнікамі гомельскай фірмы «Цеплаэнергамантаж».
— Што яшчэ зроблена для паляпшэння ўмоў жыцця пажылых людзей?
Будуем у аддзяленні лазню. Будаўніцтва пачалося летась і пры наяўнасці сродкаў павінна быць закончана ўжо ў гэтым годзе. Лазня ўзводзіцца ў традыцыйным народным стылі і ў той жа час па сучасных тэхналогіях. Там будзе і санвузел, і парылка, і пакой для адпачынку, дзе можна будзе зрабіць фітамасаж. Часткова сродкі на будаўніцтва выдзеліла швейцарская фірма, астатнія — з мясцовага бюджэту.
— Раскажыце падрабязней пра ваша супрацоўніцтва са швейцарцамі.
— Ужо не першы год дапамагае нам швейцарскі дабрачынны фонд WE-HELP. Сёлета, напрыклад, пералічыў дванаццаць тысяч еўра, дзякуючы чаму мы мадэрнізавалі душавыя кабінкі. Закуплены дзве пральныя машыны «БОШ» з загрузкаю па сем кілаграмаў.
— Хто яшчэ спансіруе аддзяленне?
— Пансіянат «ЛАДЭ» выдзеліў сродкі для набыцця шасцідзесяці пакрывалаў і камплектаў штор для жылых пакояў. Мінская фірма «Міжнародны дзелавы альянс» дапамагла мадэрнізаваць пакой для мыцця бялізны, закупіла прасавальнае абсталяванне.
Гутарыў
Уладзімір МІХНО.
На здымку: геліяўстаноўка, зманціраваная ў «Святліцы» ў межах праграмы энергазберажэння.