Злучэнне вуліц Войкава і Ульянка не адбудзецца…

Злучэнне вуліц Войкава і Ульянка не адбудзецца, пакуль не будуць закончаны ўсе будаўнічыя работы. Усяго на ўладкаванні дарожнага палатна даўжынёй звыш 160 метраў ад вуліцы Ульянка і да будынка ЦБП №206 ААТ “БПБ – Ашчадбанк” Лепельскім камунальным унітарным прадпрыемствам меліярацыйных сістэм “Лепельскае ПМС” у снежні 2014 года — пачатку 2015 года ўжо дастаўлена, высыпана і ўтрамбавана дзве тысячы тон пяску і каля 500 тон жвіру. У час нашага наведвання тут працавалі дзве грузавыя аўтамашыны-самазвалы МАЗ, за рулём якіх знаходзіліся вадзіцелі Анатоль Шарстук і Іван Шкіранда. Яны дастаўлялі з кар’ера прасеяны жвір і высыпалі яго на палатно будучай праезнай часткі вуліцы. Пасля гэтага на бульдозеры Т-130 механізатар Дзмітрый Коўзель рабіў планіроўку і трамбоўку паверхні.
Выкананы падрыхтоўчы этап работ. На чарзе — устаноўка бардзюраў, узвядзенне іншых элементаў добраўпарадкавання.
Што ж тычыцца ўкладкі асфальтабетоннага пакрыцця, то гэта, хутчэй за ўсё, будзе даручана выканаць работнікам філіяла “Лепельскае дарожнае рамонтна-будаўнічае ўпраўленне №202 КУП “Віцебскаблдарбуд” або дарожна-будаўнічаму ўпраўленню №34.
Мікалай ГАРБАЧОЎ.
На здымках: кіпіць работа па ўладкаванні дарожнага палатна паміж вуліцамі Войкава і Ульянка.
Фота аўтара.