Леанід Пашкевіч з Лепеля лічыць, што лепей сёння атрымаць рубель, чым заўтра не атрымаць дзесяць
Хто займаўся капітальным рамонтам, таму блізкае па сэнсе вядомае выказванне пра тое, што рамонт у хаце раўназначны стыхійнаму бедству. Жарты жартамі, аднак набегаешся. Сам ведаю, бо зараз з палёгкаю на душы ўспамінаю мінулы год, калі гэтае самае «стыхійнае бедства» напаткала і мяне. Мала таго, што патрэбны немалыя грошы. Патрэбна яшчэ і досвед мець — што, дзе і як лепей набыць, колькі і якога трэба матэрыялу. Набыць неабходнае, прама скажам, зараз не праблема, а вось правесці рамонт рацыянальна і якасна, не затраціўшы лішняга, укласціся ў асабісты бюджэт — тут, асабліва дылетанту, без дапамогі не абысціся.
Тое, пра што зараз кажу, актуальна для многіх, калі не для большасці. Набыць не праблема. Магазіны поўняцца будматэрыяламі, паліцы крамаў ломяцца ад разнастайнасці, прадпрымальнікі канкурыруюць між сабою і з дзяржгандлем. А вось за што набыць — задача, асабліва калі «фінансы спяваюць рамансы». Вось і бегаеш ад крамы да крамы, выбіраеш, параўноўваеш, прыцэньваешся. Большасць «перабудоўшчыкаў» так робіць, бо пакупніцкая здольнасць у насельніцтва, прама скажам, невысокая.
Шмат чаго для рамонту набываў у краме Пашкевічаў: поліпенастэрол, цэмент, шпалеры, фарбу, лак паркетны, вугалкі, электратавары і г.д. Ёсць такая крама трохпавярховая па вуліцы Партызанскай. Тут зручна, бо амаль усё на месцы можна знайсці і, што немалаважна, знайсці па прымальнай цане. Прыемны і той факт, што прадаўцы не стаяць за прылаўкам для інтэр’еру, а ўсё табе раскажуць, пакажуць, падлічуць, прапануюць прымальныя варыянты дастаўкі і аплаты.
Чаму ў Пашкевічаў танней? Ну не ўсё, вядома. Бывала, што і ў іншых крамах даводзілася набываць. Аднак у цэлым танней аказвалася ў Пашкевічаў. Чаму?
Адказ на гэтае пытанне атрымаць не спяшаўся, за клопатамі часу не было. І толькі калі ўжо рамонт завяршыўся, упершыню сустрэўся з заснавальнікамі ТАА «Беллепельзабеспячэнне» Леанідам і Вольгай Пашкевічамі.
У іх сямейны бізнэс. Вольга Сяргееўна адначасова з’яўляецца і дырэктарам магазіна. У гэтай жа сферы працуе і дачка.
* * *
Цікава было даведацца, як усё пачыналася. А пачыналася даўно, яшчэ ў пачатку перабудовы. Выпускнік СШ №3 Лёня Пашкевіч раптам надумаў ехаць паступаць у Смаленск у філіял Маскоўскага энергетычнага інстытута. Там у вёсцы «на бульбе» пазнаёміўся з расіянкаю. Вольга таксама вучылася ў інстытуце. Яшчэ студэнтамі пажаніліся, і Пашкевіч прывёз расіянку ў Лепель.
Часіны былі няпростыя. Вялікая краіна перастала існаваць, маленькая — Беларусь —толькі станавілася на ногі. Сямейным бізнэсам заняліся, каб выжыць, тым болей, што сям’я расла. Зараз у Пашкевічаў — чацвёра дзяцей.
Пачыналі з невялікага шапіка, дзе гандлявалі дробнымі электратаварамі. Затым у розныя часіны мелі гандлёвыя кропкі ў прыватным доме па Савецкай, у сталовай тэхнікума, на плошчах былога КБА. І вось ужо некалькі гадоў маюць вялікі магазін па вуліцы Партызанскай.
— Тут можна набыць практычна ўсе матэрыялы для рамонту і будаўніцтва дома, уцяплення фасаду і г.д., — расказвае Вольга. — На любы выбар ёсць матэрыял для пакрыцця даху — ад шыферу да модных зараз бітумных гонтаў, больш вядомых пад назвай кацепал. А таксама кампаненты для мантажу сістэмы водаправоду, ацяплення, радыятары, газавыя і цвёрдапаліўныя катлы. Вялікі выбар аддзелачных матэрыялаў, шпалераў, фарбы. Прычым фарбу мы можам змешваць на месцы і рабіць любы колер па заказе пакупніка.
— Якім чынам?
— Адмыслова для гэтага закупілі дарагія коштам калоры і ўстанавілі аўтамат, які робіць камп’ютарны набор неабходнага колеру.
— Напэўна, такая фарба дарагая?
— Не сказала б. Ва ўсякім разе, танней, чым самім набываць дарагія калоры.
Тым часам пытаюся ў Леаніда, аб чым даўно збіраўся запытацца:
— Чаму ў вас многія тавары танней, чым у іншых?
— Я прытрымліваюся такога правіла: лепей атрымаць рубель сёння, чым не атрымаць дзесяць заўтра, — кажа Леанід Аляксандравіч. — Такая арыфметыка бізнэсу. Трэба заўсёды лічыцца з пакупніцкімі здольнасцямі людзей. Бізнэсмэн ад гэтага толькі выйграе, а сквапнасць згубіла не толькі фраера.
— Якім чынам вы дасягаеце паразумення з пакупніком?
— Па-першае, мы часта практыкуем зніжкі. Пачатак іх дзеяння будзе дадаткова надрукаваны ў газеце. Прапануем цэлую сістэму вясенніх зніжак практычна на ўсе тавары, апрача некаторых буйнагабарытных.
— Для каго зніжкі?
— Зніжаем цэны для ўдзельнікаў войнаў, пенсіянераў, шматдзетных сем’яў, навасёлаў. І даволі істотна: ад пяці да дзесяці працэнтаў. Аднак гэта не азначае, што іншыя катэгорыі пакупнікоў застануцца абдзеленымі.
— Чаму?
— Таму што з пакупніком заўсёды трэба і можна дамаўляцца. Гэта ж рынак, і ў залежнасці ад закупкі можна па дамоўленасці з кожным рабіць індывідуальныя зніжкі, ад якіх выйграем як мы, так і нашы кліенты. Так што калі вы прыйшлі ў магазін і ўбачылі цэннік, не спяшайцеся сыходзіць у пошуках таннейшага. Цэннік — не вердыкт, а прадмет для пачатку перамоў з пакупніком.
— А як з дастаўкаю?
— Завозім. Па горадзе — бясплатна, калі пакупка звыш мільёна рублёў, а ў астатніх выпадках — па дамоўленасці з пакупніком і ў залежнасці ад магчымасцей нашага транспарту. Для дастаўкі выкарыстоўваем тры МАЗы і тры грузавыя мікрааўтобусы.
— Наколькі гарантавана якасць вашага тавару і якога ён паходжання?
— Увесь тавар сертыфікаваны і дзесьці працэнтаў на шэсцьдзясят паходжання беларускага. Яго мы набываем непасрэдна ў вытворцаў і з’яўляемся іх афіцыйнымі дылерамі.
— Праца ў будаўнічай краме мае сваю спецыфіку. Прадавец павінен быць кампетэнтным у пытаннях будаўніцтва, павінен умець зрабіць разлік. Вытворцы часта да нас наведваюцца і праводзяць з работнікамі магазіна адукацыйныя семінары.
— Якія формы разліку практыкуеце?
— Як наяўны, так і безнаяўны, працуем па крэдытах банку, пры стабільнай эканамічнай сітуацыі не выключаем і продаж у растэрміноўку.
— Ці прымаеце тавар назад?
— Так. Акрамя адмыслова замоўленага. Былі выпадкі, што нават нявыкарыстаную фарбу вярталі, калі тара была некранутая і не сышоў тэрмін прыгоднасці. Усе прэтэнзіі стараемся вырашаць на карысць пакупніка.
Уладзімір МІХНО.
На здымках: Леанід Пашкевіч; менеджар па продажы Юрый Еўтушэнка ў «Будмаркеце» прапануе фарбу і лакі на любы густ; Аксана Пруднік дапамагае ў магазіне «Аптовы» выбраць шпалеры.
Фота аўтара.