Лучший по профессии

Міхаіл Доўгі — выпускнік Новалукомльскага дзяржпрафліцэя па спецыяльнасці тынкоўшчык. У лістападзе 2012 года малады мужчына ўладкаваўся на працу ў Лепельскую ПМК-75 менавіта па гэтай спецыяльнасці, аднак спачатку працаваць па ёй не змог. Што называецца, не пайшло. Затое праца ў цяслярскай брыгадзе аказалася якраз па ім. Цяпер з сякерай, пілой, малатком і іншым інструментам Міхаіл хутка і якасна робіць любыя драўляныя канструкцыі: апалубку пад бетон, кроквенную сістэму на дах, падлогу, столь і шмат чаго іншага. Хлопец знайшоў сябе. Любую новую справу ён схоплівае, што называецца, на ляту, асвойвае адным з першых. Выбар справы аказаўся настолькі паспяховым і ўдалым, што Міхаіла Доўгага ад прадпрыемства вылучылі на злёт перадавікоў як лепшага ў сваёй прафесіі. Яно і не дзіўна, цясляр мае чацвёрты кваліфікацыйны разрад — самы высокі, які прысвойваецца ў ПМК-75.
Тэкст і фота В. МАТЫРКІ.