Навагодні круіз на Лепельшчыне
Надыходу Новага года мы заўсёды чакаем з прыемным прадчуваннем ажыццяўлення казачных дзівосаў і здзяйснення светлых мар. Як і дзеці, мы, дарослыя, чакаем падарункаў, пад бой курантаў загадваем запаветныя жаданні і верым, што наперадзе нас чакае ўсё самае светлае, лепшае і дарагое. А якое ж навагодняе свята без вясёлай музыкі, спеваў і танцаў? Адправіцца ў навагодні круіз, атрымаць зарад творчай энергіі і выдатнага настрою запрасілі гледачоў самыя артыстычныя і знаходлівыя прадстаўнікі аграгарадкоў і вёсак нашага раёна.
“Навагодні круіз-2014” — менавіта так называўся раённы конкурс сярод сельскіх клубных устаноў, які праходзіў у Каменскім СДК. У творчы паядынак уступілі каманды Чарэйшчынскага, Баброўскага і Каменскага сельскіх дамоў культуры, а таксама Матырынскага сельскага клуба. Арганізатары мерапрыемства — работнікі раённага Дома культуры — надалі конкурсу асаблівыя непаўторнасць і творчы каларыт.
Гледачы адчулі сябе ўдзельнікамі яркага відовішчнага шоу, калі на сцэне ў вобразе дзвюх піратак з’явіліся Таццяна Стрыжонак і Вольга Якубовіч. Яны паведамілі аб тым, што іх заложнікамі сталі мясцовыя артысты. Ім патрэбна зрабіць усё магчымае дзеля таго, каб спадабацца гледачам і падарыць ім свята. Выявіць жа лепшых артыстаў неабходна было камандаванню карабля — журы конкурсу.
У першым туры кожная з каманд павінна была прэзентаваць відэаролік “Навагодняе віншаванне”. Артысты Чарэйшчынскага сельскага Дома культуры падрыхтавалі цёплае віншаванне Дзеда Мароза і Снягурачкі. Госці з Матырынскага сельскага клуба расказалі аб дзейнасці сваёй установы пры дапамозе яркіх фотаздымкаў, а загадчыца клуба Людміла Пшанко ў ролі Казы павіншавала гасцей цёплымі вершамі.
Узняў настрой камічны відэаролік Баброўскага сельскага Дома культуры. …Напярэдадні Новага года мужчына ўвайшоў у дом. Гаспадароў у ім не аказалася, але пад ёлкай было шмат падарункаў. Да таго ж непадалёк быў касцюм Дзеда Мароза. Мужчына не разгубіўся — пераапрануўся, склаў у мех падарункі і выйшаў на вуліцу. Дзеда Мароза акружылі дзеці, якія, вядома ж, вельмі хацелі атрымаць святочны падарунак. Атрымалі. І раптам… да яго падышла прыгожая дзяўчына, у якую “дзядуля” закахаўся. Дзед Мароз надзеў ёй на палец пярсцёнак, і пара пайшла разам сустракаць свята.
Калейдаскоп яркіх віншавальных паштовак і навагодніх пажаданняў адрасавалі гледачам артысты Каменскага сельскага Дома культуры.
У другім туры конкурсу “Нашы таленты” цёплымі акордамі песень прывіталі гледачоў выканаўцы з Чарэйшчыны. Сустрэла ўсіх юная вядучая, вучаніца Бароўскай сярэдняй школы Юлія Шартух. Яна ж падарыла гледачам цудоўную песню. Нікога не пакінулі раўнадушным спевы Алы Віткоўскай і Уладзіміра Рабчонка. Выдатны падарунак падрыхтавалі гасцям і артысты Баброўскага СДК — юныя спевакі Анастасія Бондал і Максім Малярчук, мясцовая выканаўца Марыя Бондал, а таксама ўдзельнікі вакальнай групы “Ляночак”. Развесяліла гледачоў мініяцюра, прадстаўленая артыстамі Каменскага сельскага Дома культуры. Гледачы ад душы смяяліся, назіраючы за тым, як прадпрымальная бабуля трапіла на прыём да міліцыянера. Выдатным дапаўненнем сцэнічнай дзеі стаў танец лялек, з якім выступілі Наташа Аўгусціновіч, Оля Унуковіч і Ксенія Хацкевіч. Цёпла было сустрэта і выступленне самадзейнай спявачкі Ганны Салаўёвай, дырэктара Каменскага СДК Анжэлы Пятрышчы з песняй “Пажаданне”.
А якое ж свята без шчодрых пачастункаў? У кулінарным паядынку “Дары гаспадыні года” вяскоўцы гасцінна запрасілі членаў журы пачаставацца смачнымі навагоднімі стравамі і да кожнай з іх падрыхтавалі арыгінальнае прадстаўленне. Гаспадары з Чарэйшчыны прапанавалі гледачам пакаштаваць фаршыраванага перцу. Прыгожую салату “Барашак з гародніны” прыгатавалі матырынскія кулінары. Пачаставацца смачнай салатай у выглядзе козачкі запрасілі гледачоў гаспадары Баброўскага сельскага Дома культуры, а каменскія артысты прапанавалі пакаштаваць свежай капусты і апетытную салату.
Уразіў гледачоў і трэці этап конкурсу — шоу пераўвасабленняў “Точь-в-точь”. На самой справе атрымалася яркая каларытная дзея, дзе ў адзінай гармоніі зліліся вакальнае майстэрства і артыстызм.
Мілагучнай лірычнай песняй сустрэла гледачоў Тамара Крыўко (аграгарадок Чарэйшчына) ў вобразе Надзеі Кадышавай, з вёскі Матырына на свята прыехаў Стас Міхайлаў, якога ўдала сыграў Міхаіл Шалак. Артысты Баброўскага сельскага Дома культуры выступілі з папулярнай песняй з рэпертуару эстраднай групы “Дзюна”. Цёплымі апладысментамі гледачы падтрымалі выступленне Леаніда Забабуры з аграгарадка Камень у вобразе Веркі Сярдзючкі. Папулярную песню выразна дапоўніла жартоўная мініяцюра.
Пераможцай конкурсу стала каманда Баброўскага сельскага Дома культуры. Крыху менш балаў набралі артысты Каменскага СДК, якім прысуджана другое месца. Каманды ж Чарэйшчынскага сельскага Дома культуры і Матырынскага сельскага клуба атрымалі Дыпломы за актыўны ўдзел у конкурсе. Акрамя таго, кожная з каманд атрымала ў падарунак духмяны каравай.
І ўсё ж, упэўнена, у гэты цудоўны вечар самай галоўнай узнагародай для артыстаў сталі шчырыя прызнанні гледачоў, якім быў падораны святочны настрой. Са сцэны льюцца цёплыя акорды музыкі, а сэрца напаўняецца прыемным прадчуваннем навагодніх дзівосаў…
Святлана
СІЛЬВАНОВІЧ.
На здымках: выдатна выканаў ролю Стаса Міхайлава спявак Міхаіл Шалак з вёскі Матырына; усім узнялі настрой артысты групы “Дзюна” з Баброва; яркай мініяцюрай уразілі гледачоў “Верка Сярдзючка” і іншыя артысты з аграгарадка Камень; вось так прыгожа і апетытна выглядалі стравы, прыгатаваныя ўдзельнікамі круізу.
Фота аўтара.