Вопыт замежных калег
Спецыялісты Бярэзінскага біясфернага запаведніка прынялі ўдзел у пасяджэнні працоўнай групы Сусветнай камісіі па прыродных тэрыторыях, Міжнароднага саюза аховы прыроды па рэгіёне Паўночная Еўразія, якія асабліва ахоўваюцца. Прадстаўнікі Расіі, Беларусі, Украіны і Казахстана сабраліся ў Палістоўскім запаведніку ў Расіі, абмеркавалі магчымасці сумеснай прэзентацыі на Міжнародным кангрэсе паркаў, што адбудзецца ў лістападзе ў Сіднеі. Удзельнікі сустрэчы пазнаёміліся з новым візіт-цэнтрам Палістоўскага запаведніка, прайшлі па чатырохкіламетровай экалагічнай сцяжыне, пракладзенай праз балоты.
Усёй сям’ёй
Свята “Наша дружная сям’я” прайшло ў Горках. У ім удзельнічалі адразу некалькі ўстаноў — СДК, бібліятэка і школа. Віктарыны, гульні, казачныя персанажы паднялі настрой не толькі дзецям, але і іх бацькам, якія таксама завіталі на свята.
Намалявалі сваякоў
Сямейнае свята прайшло і ў Баброве. Сумеснае мерапрыемства правялі сельская бібліятэка-музей Язэпа Драздовіча і СДК. Сваю з’яднанасць і веданне адзін аднаго паказвалі тры сям’і — Пліско, Галай і Сідарцовы. Намаляваць усіх членаў сям’і і адказаць на пытанні пра сваякоў — адны з тых заданняў, якія выконвалі канкурсанты.
«Кніжная мазаіка»
У Поўсвіжскай сельскай бібліятэцы першакласнікаў пасвяцілі ў чытачоў. Сапраўднае свята для малодшых школьнікаў падрыхтавала бібліятэкар Людміла Сільвановіч. З правіламі паводзін у бібліятэцы пазнаёміла дзяцей Каралева кнігі. Яна ж прапанавала ім па ўрыўках адгадаць творы. Вершы пра кнігу расказалі і самі дзеці. А паштальён Печкін прынёс ім тэлеграмы ад казачных герояў. Для новых чытачоў спецыяльна зрабілі і выставу “Кніжная мазаіка”, на якой можна было выбраць літаратуру на свой густ. Завяршылася мерапрыемства “салодкім сталом”.
