Аляксандр Садоўскі распавёў пра дзейнасць структуры МНС на Лепельшчыне
Напярэдадні прафесійнага свята выратавальнікаў мы пагутарылі з інспектарам групы прапаганды і ўзаемадзеяння з грамадскасцю РАНС Аляксандрам Садоўскім.
— Аляксандр Міхайлавіч, мы сутыкаемся з ратаўнікамі, калі, не дай бог, што здарыцца, але мала ведаем пра іх штодзённыя справы і звычайныя будні…
— Пачну са структуры. Раённы аддзел па надзвычайных сітуацыях складаецца з пажарна-аварыйнай часці і пяці пажарна-аварыйных пастоў, размешчаных у Камені, Бароўцы, Валосавічах, Домжарыцах і Слабадзе. У штаце аддзела — восемдзесят дзевяць чалавек, з іх чатырнаццаць афіцэраў. У часці дзейнічаюць два баявыя разлікі і адзін рэзервовы. Баявы разлік сфарміраваны з начальніка варты, камандзіра аддзялення, старшага пажарнага, вадзіцеля. На пастах дзяжураць камандзір аддзялення і вадзіцель.
— Якім чынам размяшчаюцца пасты?
— Яны павінны размяшчацца так, каб да аб’ектаў можна было дабрацца не пазней, чым за дзесяць хвілін. На кожным пасту працуюць дзве адзінкі тэхнікі, папросту кажучы, пажарныя машыны — у зімовым і летнім варыянце.
— Якімі яшчэ прыстасаваннямі карыстаюцца пажарныя?
— У нас ёсць таксама аўталесвіца вышынёй трыццаць метраў (яна раскладаецца прама з машыны), рукаўны ход, помпавая станцыя, аварыйна-выратавальны аўтамабіль, кран.
Маем хімічную службу. На кожнай змене ёсць штатны хімік-дазіметрыст. Працуюць таксама групы выратавання на вадзе — у горадзе, Бароўцы і Домжарыцах. У кожнай сельскай мясцовасці задзейнічаны па сем чалавек, а ў горадзе — тры змены па сем чалавек. У іх распараджэнні дзве лодкі з маторамі, спецыяльныя касцюмы для выратавання на вадзе.
— Чым займаецца хімічная служба?
— Апошнім часам служба ліквідуе пагрозу атручвання ртуццю. Перад самым Новым годам у Лепелі па вуліцы Валадарскага разбіўся ртутны тэрмометр. Крыху раней у Слабадзе ў нежылым доме знайшлі паўтара кілаграма гэтага атрутнага рэчыва. А нядаўна на тэрыторыі «Лепельбудінвестсэрвісу» выкапалі наўпрост з зямлі гумавую «грушу» з трыма кілаграмамі ртуці.
— Ці часта даводзіцца тушыць пажары?
— Летась выязджалі на пажары дваццаць два разы. Два чалавекі загінулі ў агні. І ўжо сёлета ў навагоднія святы адбыўся буйны пажар у Стаях.
— Якія прычыны ўзгаранняў?
— Розныя. Летась, напрыклад, было два падпалы, чатыры пажары ўзніклі ў выніку няправільнай эксплуатацыі электраабсталявання, столькі ж — у выніку праблем з пячным ацяпленнем, дзесяць узгаранняў узнікла з-за неасцярожнага абыходжання з агнём. Былі ўзгаранні і ад удару бліскавіцы, і пры зварачных работах. Прычыны сёлетняга пажару пакуль устанаўліваюцца, аднак, хутчэй за ўсё, ён звязаны з курэннем у ложку п’янага чалавека.
— Дзе яшчэ задзейнічаны ратаўнікі?
— Ахоўваем тэхніку на палявых станах, выязджаем на дарожна-транспартныя здарэнні. Летась на ДТЗ выязджалі пяць разоў. Больш за шесцьдзясят выездаў зрабілі на ліквідацыю гнёзд восаў і шаршнёў. Для гэтага закупілі два спецкасцюмы. Патушылі шаснаццаць пажараў рознай ступені складанасці ў экасістэмах. Правялі дзвесце пяцьдзясят чатыры сумесныя рэйды і праінструктавалі паўтары тысячы чалавек.
Гутарыў
Уладзімір МІХНО.