Лепельскі электрамеханік
Аляксандр Гершанковіч пасля заканчэння ў 1995 годзе Лепельскага гідрамеліярацыйнага тэхнікума, праходжання тэрміновай службы ў арміі, з верасня 1997 года і па цяперашні час добрасумленна выконвае нялёгкія абавязкі сувязіста. Доўгія гады Аляксандр Алегавіч працаваў электраманцёрам лінейных збудаванняў сувязі і праваднога вяшчання, а з красавіка 2014 года быў пераведзены на пасаду электрамеханіка лінейных збудаванняў сувязі і абаненцкіх прылад гарадскога лінейна-тэхнічнага ўчастка сувязі.
— У апошні час займаюся пераключэннем медных правадных ліній сувязі на оптыка-валаконныя, — паведаміў Аляксандр Гершанковіч. — Гэта дазваляе нашым абанентам нашмат якасней карыстацца высокахуткасным інтэрнэтам, інтэрактыўным лічбавым тэлебачаннем “Зала”, іншымі паслугамі.
— Чым захапляецеся ў вольны час?
— Зараз двойчы на тыдзень наведваю секцыю па валейболе раённага фізкультурна-аздараўленчага цэнтра. Наогул, сябрую са спортам, стараюся падтрымліваць сябе ў добрым фізічным стане.
За час работы на прадпрыемстве Аляксандр Гершанковіч зарэкамендаваў сябе як дасведчаны, кваліфікаваны спецыяліст. Ён забяспечвае належную тэхнічную эксплуатацыю, абслугоўванне і рамонт абсталявання, надзейную работу тэхнічных сродкаў і якасную перадачу ўсіх відаў інфармацыі.
Па паслугах тэлефоннай сувязі пастаўлена задача па больш актыўным падключэнні абанентаў да паслуг на базе платформы IMS. І самы актыўны ўдзел у падключэнні дадзенай тэхналогіі ў горадзе прымае Аляксандр Гершанковіч. Не выпадкова таму ён быў па выніках 2014 года прызнаны пераможцам раённага індывідуальнага спаборніцтва, узнагароджаны Ганаровай граматай райвыканкама і заахвочаны грашовай прэміяй.
М. АНОШКА.
На здымку: Аляксандр Гершанковіч.
Фота аўтара.