Сладкие сюрпризы для постояльцев «Святліцы», что на Лепельщине
Прадстаўнікі СААТ “Камунарка” напярэдадні вясновага свята па шматгадовай традыцыі наведалі аддзяленне кругласутачнага знаходжання для грамадзян пажылога ўзросту «Святліца» тэрытарыяльнага цэнтра сацыяльнага абслугоўвання насельніцтва
Лепельскага раёна, якое знаходзіцца ў аграгарадку Камень.
З вялікім задавальненнем людзі ў сталым узросце прымаюць тых, хто да іх адносіцца з душой. Яны адчуваюць кожны позірк, іх лёгка раніць. Аднак добрае слова, як вядома, сагравае сэрца і дорыць радасць.
— …Вы вельмі шмат ведаеце пра жыццё, многае можаце расказаць і шмат чаму навучыць. Ваша высакародная сівізна азначае не толькі ўзрост, а і бязмежную мудрасць, неацэнны вопыт і багацце ведаў, — звярнулася да пастаяльцаў “Святліцы” Алена Фёдарава, начальнік сектара па выставачнай дзейнасці СААТ “Камунарка”. — Надышла вясна — пачатак жыцця ў прыродзе, першае цяпло. Нездарма менавіта ў гэтую пару года святкуецца 8 Сакавіка. Гэта самы пяшчотны, светлы і цудоўны дзень. Жадаем вам доўгіх і шчаслівых гадоў, напоўненых здароўем, спакоем, шчасцем і клопатам. Каб, нягледзячы на ўзрост, вы ніколі не страцілі душэўную маладосць.
Ад імя генеральнага дырэктара прадпрыемства Івана Данчанкі і ўсяго калектыву Алена Анатольеўна таксама падзякавала тым, хто працуе ў аддзяленні і ТЦСАН Лепельскага раёна за высакародную працу і ініцыятыву, бо вельмі важна ствараць свята для людзей, якім патрэбна дапамога, атуляць іх цеплынёй і ўвагай. Жанчына падкрэсліла, што толькі працуючы разам можна дасягнуць той атмасферы, якая пануе зараз сярод пастаяльцаў і работнікаў “Святліцы”.
Прадстаўнік “Камунаркі” прыехала не адна, а са сваімі памочнікамі — Чырвоным Капялюшыкам і двума вавёрачкамі, якія ўручылі ўсім прысутным наборы цукерак. Як толькі казачныя персанажы пачалі за руку вітацца з жыхарамі “Святліцы”, ад усмешак, здавалася, аж стала святлей у зале. Упэўнена, падораныя эмоцыі ўзнялі настрой не на адзін дзень. Такія акцыі даюць магчымасць людзям у сталым узросце адчуць, што дзяржава памятае пра іх, выкарыстоўвае кожную магчымасць, каб дапамагчы.
— Свет трымаецца на нераўнадушных, добразычлівых людзях, якія заўсёды гатовы падтрымаць іншых словам і справай. Ваша дапамога для нас вельмі каштоўная. Жадаем калектыву СААТ “Камунарка” вялікіх поспехаў у працы, здароўя і ўсяго самага найлепшага, — адзначыла Наталля Іванова, дырэктар ТЦСАН Лепельскага раёна. Наталля Віктараўна ўручыла шаноўным гасцям кухонныя ручнікі з сімвалічнымі беларускімі малюнкамі, якія шыюць гурткоўцы ў цэнтры.
Наталля Віктараўна павіншавала ўсіх прысутных жанчын са святам, пажадала ім здароўя, шчасця, дабрабыту і ўсяго самага найлепшага.
З нагоды вясновага свята наведвальнікі музычна-тэатральнага гуртка аддзялення дзённага знаходжання для пажылых у вёсцы Бароўка ТЦСАН Лепельскага раёна, вакальная група «Сударушки» на чале з кіраўніком Нінай Бяздзенежных падрыхтавалі цікавую канцэртную праграму. Кампазіцыі артыстаў вярнулі жыхароў «Святліцы» ў гады іх маладосці. Прыемныя мелодыі ліліся па ўсім будынку. Як толькі загучала песня “Мае вочы чорныя”, амаль усе прысутныя сталі падпяваць і апладзіраваць у такт. Шмат нумароў было прысвечана менавіта жанчынам, але і мужчыны не засталіся па-за ўвагай. Для сябе зрабіла выснову, што моцная палова шмат ведае песень і не супраць прадэманстраваць свае вакальныя даныя. Увогуле, канцэрт нікога не пакінуў абыякавым: многія падпявалі, у некаторых ад знаёмых мелодый на вачах з’яўляліся слёзы.
Шмат цеплыні і шчырасці адчувалася ў выступленнях артыстаў. Падабраны рэпертуар вельмі спадабаўся ўсім прысутным.
Здавалася, што падчас святочнай дзеі людзі сталага веку забыліся пра свае хваробы і праблемы. Задаволеныя жыхары не шкадавалі апладысментаў за створанае свята, не жадалі адпускаць гасцей і шчыра прасілі часцей іх наведваць.
Пасля канцэрта мы пагутарылі з Аленай Фёдаравай:
— Гэта вельмі важны для нас сацыяльны праект. “Камунарка” ўжо шмат гадоў ажыццяўляе розныя дабрачынныя акцыі-дэгустацыі, прэзентацыі ўласнай прадукцыі. Мы часта наведваем дзіцячыя дамы, школы, установы такога кшталту. Заходзім у іх заўсёды з адкрытым сэрцам, шчырасцю, не забываем і пра салодкія сюрпрызы. Каб свята было больш запамінальнае, у ім удзельнічаюць і казачныя персанажы. Лічу, што гэта вельмі патрэбная справа. Мы бачым, з якой радасцю пажылыя людзі ўспрымаюць канцэрт і невялікія падарункі, якія для іх падрыхтавалі.
Адчуваецца, што работнікі аддзялення робяць усё магчымае, каб пастаяльцы адчувалі сябе ў гэтым месцы ўтульна і камфортна. Для многіх жыхароў перыяд знаходжання тут стаў новай старонкай у жыцці, бо самотныя людзі знайшлі сабе сяброў, даўніх знаёмых і нават сваё каханне. Зараз у “Святліцы” пражываюць 50 чалавек, якія ўтвараюць з’яднаны калектыў.
Наталля
ХРАПАВІЦКАЯ.