«Дело было вечером, делать было нечего», таму лепяльчанін падаўся на сумніцельныя гастролі
Мужчына, 1984 года нараджэння, пражывае па вуліцы Спірыдовіча, нідзе не працуе, на момант апісваемых падзей меў ужо судзімасць за крадзеж. Як пісаў паэт, “дело было вечером, делать было нечего”. Магчыма, з-за гультайства лепяльчанін учыніў сабе забаву — злачынныя гастролі. Літаральна за дзень здзейсніў тры злачынствы. Спачатку ўзламаў дзверы дома. Злодзей скраў дзевяць балонаў мантажнай пены і мантажны пісталет. Урон — 192 тысячы рублёў.
Першага эпізоду падалося мала, таму ў той жа дзень злачынца падабраў ключы, залез у другі дом. Там разжыўся мабільным тэлефонам “Самсунг” коштам 390 тысяч рублёў.
А “на закуску” паспрабаваў украсці аўтамашыну. Жанчына, работніца ААТ “Беларусбанк”, пакінула сваю “Аўдзі-100” на паркоўцы. Праз некаторы час прыйшла і ўбачыла, што там паспеў нехта пабываць — з-пад замка запальвання выцягнуты правады.
Падазроны затрыманы, частка ўкрадзенага вернута гаспадарам.
