Канструктыўная размова аб праблемах мясцовага маштабу
Інфармацыйна-прапагандысцкая група райвыканкама пад кіраўніцтвам начальніка фінансавага аддзела райвыканкама Святланы Анышка наведала Лепельскае раённае вытворчае ўпраўленне газавай гаспадаркі “Лепельрайгаз”. Работа групы была прысвечана тэме “Подзвігу народа жыць у стагоддзях” (да 70-годдзя Перамогі савецкага народа ў Вялікай Айчыннай вайне”). З дакладам на гэту тэму выступіла аўтар гэтых радкоў.
У час выступлення ўдзельнікаў групы прысутныя звярнуліся да іх з набалелымі пытаннямі.
— У жыхароў прыватнага сектара нярэдка ўзнікае праблема ўтылізацыі будаўнічых адходаў. Смеццявоз можа прыняць толькі да васьмі кілаграмаў бытавых адходаў.
Адказаў галоўны інжынер ЛКУВП ЖКГ “Лепель” Віктар Шалаеў:
— Для таго, каб утылізаваць вялікую колькасць будаўнічых адходаў, неабходна пазваніць дыспетчару ЛКУВП ЖКГ “Лепель” і заказаць трактар.
— Калі будзе праведзена падсыпка вуліц 1-я і 2-я Сянная, а таксама вуліц Меліяратараў, 2-я Савецкая?
— Для правядзення рамонту дарог заўсёды патрэбны значныя фінансавыя сродкі. Не вядзецца рамонт дарог на вуліцах, дзе плануецца праводзіць газавыя і водныя камунікацыі.
— Калі будзе пабудаваны дзіцячы сад у раёне новых шматкватэрных дамоў па вуліцы Чуйкова?
На пытанне адказаў начальнік аддзела адукацыі, спорту і турызму райвыканкама Валерый Быкаў:
— На ўзвядзенне новага будынка дзіцячага сада неабходна затраціць каля 50 мільярдаў рублёў. Аднак у дзіцячых дашкольных установах горада ёсць дастатковая колькасць месцаў для выхаванцаў, таму будаваць новы дзіцячы сад у цяперашні час немэтазгодна.
— Ці плануецца ў бліжэйшым будучым павялічыць пенсійны ўзрост?
Намеснік начальніка ўпраўлення па працы, занятасці і сацыяльнай абароне райвыканкама Марына Іназемцава адказала, што ў бліжэйшы час пенсійны ўзрост павялічвацца не будзе.
— У магазіне “Універмаг” вельмі холадна, недастаткова святла ў прымерачнай.
— Ці запланавана ў горадзе адкрыццё магазіна “Еўраопт”?
— У магазіне №108 “Універсам” райспажыўтаварыства, размешчаным у вёсцы Заслонава, у пятніцу вечарам хутка разбіраюцца малочныя вырабы і хлеб. Такім чынам, у выхадныя дні гэтыя прадукты набыць немагчыма.
Адказала на пытанні галоўны эканаміст райспажыўтаварыства Тамара Дуж:
— Так, наладзіць належнае ацяпленне ва ўнівермазе немагчыма з-за адсутнасці фінансавых сродкаў. У цяперашні час нават немагчыма павысіць заработную плату прадаўцоў.
— Магазін “Еўраопт” плануецца адкрыць у адным з гандлёвых памяшканняў нашага горада прыкладна ў лістападзе бягучага года.
— Пытанне адсутнасці належнай колькасці малочных вырабаў, хлеба ў магазіне ў вёсцы Заслонава будзе ўзята на кантроль.
Святлана
СІЛЬВАНОВІЧ.